BAKI,TurkicWorld,Yusif Şərifzadə
İsrailin keçmiş xarici işlər naziri Tzipi Livni ölkəsinin Livandakı siyasətini sərt tənqid edib.
TurkicWorld xəbər verir ki, Livni bu barədə sosial şəbəkə platforması “X”də paylaşım edib.
O bildirib ki, hazırkı hökumətin Livandakı addımları İsrail üçün ciddi strateji uğursuzluq yaradır və bu vəziyyət daha əvvəl qarşısı alına bilərdi.
Livninin sözlərinə görə, ABŞ və İran arasında aparılan danışıqlar çərçivəsində İsrailin Livandakı hərbi əməliyyatlarının dayandırılması üçün mövcud mexanizm uğursuzluq nümunəsidir.
O qeyd edib ki, bu vəziyyət İsrail üçün “çox ağır nəticələr” doğurur və hökumətin hərbi nailiyyətləri təhlükəsizlik strategiyasına çevirmədiyini göstərir.
Keçmiş nazir bildirib ki, onun təklif etdiyi modelə əsasən ABŞ, İsrail və Livanın iştirakı ilə BMT Təhlükəsizlik Şurasının 1701 saylı qətnaməsinin icrası təmin edilə bilərdi.
Onun fikrincə, həmin dövrdə İran və Hizbullah daha zəif mövqedə idi və Hizbullahın tərksilah edilməsi beynəlxalq səviyyədə də qəbul edilə biləcək məqsəd idi.
Livni əlavə edib ki, İsrail ordusu (İDF) sahədəki dəyişikliklərə uyğun əməliyyatlarını davam etdirə bilərdi.
O sonda hazırkı hökumətin dəyişməli olduğunu vurğulayaraq bildirib ki, yalnız hərbi gücə əsaslanan siyasət yeni uğursuzluqlara gətirib çıxaracaq.
