BAKI,TurkicWorld,Yusif Şərifzadə
ABŞ və İran arasında davam edən danışıqlarda maliyyə məsələlərinin əsas mübahisə mövzularından biri olaraq qaldığı bildirilir.
TurkicWorld xəbər verir ki, Doha Ali Təhsil İnstitutunun əməkdaşı Mühənnəd Səllum ABŞ və İran arasında davam edən danışıqların perspektivləri barədə fikirlərini bölüşüb.
Ekspert bildirib ki, tərəflər arasında əsas fikir ayrılıqlarından biri ABŞ-da dondurulmuş vəziyyətdə saxlanılan təxminən 24 milyard dollarlıq İran aktivləri ilə bağlıdır.
Onun sözlərinə görə, Tehran yüksək səviyyədə zənginləşdirilmiş uran ehtiyatları ilə bağlı güzəştə gedəcəyi halda bunun müqabilində real iqtisadi qarşılıq gözləyir.
Mühənnəd Səllum hesab edir ki, maliyyə vəsaitlərinin sərbəst buraxılması İranı razılaşmaya yaxınlaşdıra biləcək əsas amillərdən biri ola bilər.
Ekspert qeyd edib ki, ABŞ Prezidenti Donald Trampın əsas məqsədi yeni hərbi qarşıdurmaya başlamaq deyil, təzyiq və diplomatik vasitələrdən istifadə etməklə razılaşma əldə etməkdir.
Bununla belə, onun fikrincə, hərbi variant tamamilə gündəmdən çıxarılmayıb və Vaşinqton regiondakı hərbi imkanlarını qoruyub saxlayır.
Mühənnəd Səllum həmçinin bildirib ki, İran tərəfinin ABŞ administrasiyasına ehtiyatla yanaşmasının müəyyən tarixi səbəbləri mövcuddur və bu amil danışıqlarda qarşılıqlı etimadın formalaşmasını çətinləşdirən əsas məsələlərdən biri hesab olunur.
Analitiklərin fikrincə, sanksiyaların yumşaldılması, dondurulmuş aktivlərin taleyi və nüvə proqramı ilə bağlı məsələlər ABŞ-İran danışıqlarının yekun nəticəsini müəyyən edəcək əsas mövzular olaraq qalır.
