BAKI,TurkicWorld,Yusif Şərifzadə
Livanın cənubunda yerləşən Zifta şəhərində təhlükəsizlik vəziyyəti daha da gərginləşib.
TurkicWorld xəbər verir ki, Zifta bələdiyyəsi İsrail tərəfindən səsləndirilən yeni təhdidlərdən sonra şəhər sakinlərinə xüsusi xəbərdarlıq müraciəti ünvanlayıb.
Bələdiyyənin yaydığı bəyanatda bildirilib ki, şəhərin boşaldılması ilə bağlı təkrar çağırışlar fonunda sakinlər mümkün olan hər yerdə sığınacaq tapmalı və təhlükəsizlik tədbirlərinə ciddi riayət etməlidirlər.
Müraciətdə qeyd olunub ki, sığınacaq tapmaq imkanı olmayan şəxslər təhlükəsizlik məqsədilə evlərində qalmalıdırlar.
Bələdiyyə eyni zamanda şəhər daxilində hərəkətin minimuma endirilməsini, insanların kütləvi şəkildə bir araya gəlməməsini və təhlükəsizlik orqanlarının göstərişlərinə əməl olunmasını tələb edib.
Açıqlamaya əsasən, hava hücumu baş verdiyi halda hadisə yerinə yaxınlaşmaq və ya toplaşmaq qəti şəkildə qadağandır. Yalnız rəsmi vəzifəsini yerinə yetirən şəxslərə, xilasedicilərə və fövqəladə hallara müdaxilə edən əməkdaşlara həmin ərazilərdə fəaliyyət göstərməyə icazə verilir.
Qeyd edək ki, İsrail ordusu daha əvvəl Zifta və ətraf yaşayış məntəqələrinin sakinlərinə evlərini tərk etmələri barədə xəbərdarlıq etmişdi. Son saatlarda bölgədə hava hücumlarının və evakuasiya çağırışlarının artdığı bildirilir.
Müşahidəçilər hesab edirlər ki, Livanın cənubunda davam edən hərbi əməliyyatlar və qarşılıqlı hücumlar bölgədə humanitar vəziyyətin daha da ağırlaşmasına səbəb ola bilər.
