BAKI,TurkicWorld,Yusif Şərifzadə
İsrail ordusunun Livanın cənub-şərqində yerləşən strateji yüksəkliklər istiqamətində irəliləməsi bölgədə hərbi vəziyyətin daha da mürəkkəbləşdiyini göstərir.
TurkicWorld xəbər verir ki, İsrail qoşunlarının Livanın cənub-şərq sektorunda yerləşən Yohmor və Zəvtar əl-Şərqiyyə kəndləri istiqamətində hərəkət etdiyi bildirilir.
Məlumata görə, həmin yaşayış məntəqələrinin strateji əhəmiyyəti onların coğrafi yerləşməsi ilə bağlıdır. Hər iki kənd Nəbatiyyə şəhərinə yaxın ərazidə yerləşir və ümumi bölgə yüksək relyefli təpəliklərdən ibarətdir.
Hərbi müşahidəçilər qeyd edirlər ki, bu yüksəkliklərə nəzarət edən tərəf ətraf ərazilər üzərində geniş müşahidə və taktiki üstünlük əldə edir. Bu isə həm hərbi əməliyyatların koordinasiyası, həm də nəzarət imkanlarının genişləndirilməsi baxımından mühüm əhəmiyyət daşıyır.
Ekspertlərin fikrincə, İsrailin hazırkı əməliyyatlarının əsas məqsədlərindən biri məhz bu strateji yüksəkliklər üzərində nəzarəti təmin etməkdir. Bildirilir ki, İsrail Livanın cənubunu işğal altında saxladığı əvvəlki illərdə də əsas hərbi mövqelərini məhz bu tip təpəliklərdə qurmuşdu.
Analitiklər vurğulayırlar ki, yüksəkliklərə nəzarət həm vizual müşahidə imkanlarını artırır, həm də artilleriya və pilotsuz uçuş aparatlarının daha effektiv istifadəsinə şərait yaradır.
Bununla yanaşı, Hizbullah qüvvələrinin bölgədə müqavimət göstərdiyi və İsrailin irəliləyişini çətinləşdirdiyi qeyd olunur. Son günlər Cənubi Livanda həm hava hücumlarının, həm də quru əməliyyatlarının intensivləşməsi bölgədə daha genişmiqyaslı qarşıdurma riskini artırıb.
Humanitar təşkilatlar isə davam edən döyüşlərin mülki əhali üçün ciddi təhlükə yaratdığını və yeni köç dalğasına səbəb ola biləcəyini bildirirlər.
