BAKI,TurkicWorld,Yusif Şərifzadə
ABŞ Maliyyə Nazirliyi İranın nəqliyyat və logistika imkanlarını hədəf alan yeni məhdudiyyətlərin tətbiq olunacağını açıqlayıb.
TurkicWorld xəbər verir ki, ABŞ Maliyyə naziri Skott Bessent Vaşinqtonun İranın “Fars Körfəzi Boğazı İdarəsi” (PGSA) adlı yeni qurumuna qarşı sanksiyalar tətbiq etdiyini bildirib.
Nazirin sözlərinə görə, həmin struktur ABŞ tərəfindən “ciddiyə alınmayan bir qurum” hesab olunur. Bessent qeyd edib ki, ABŞ şirkətlərinə və dövlət qurumlarına Hörmüz boğazından keçid üçün “ödəniş” və ya “gizli yardım rüsumu” adı altında hər hansı vəsait ödəməmələri barədə xəbərdarlıq edilib.
Skott Bessent əlavə edib ki, Vaşinqton İran aviaşirkətlərinin beynəlxalq fəaliyyət imkanlarını da məhdudlaşdırmağa hazırlaşır. Bu çərçivədə İran hava yollarının xarici hava limanlarına eniş, yanacaq doldurma və beynəlxalq bilet satışı imkanlarının məhdudlaşdırılması nəzərdə tutulur.
ABŞ rəsmisi bildirib ki, regionda gərginliyin davam etməsinin qarşısını almağın yeganə yolu danışıqlarda “qənaətbəxş nəticə” əldə olunmasıdır.
Analitiklər hesab edirlər ki, Vaşinqtonun son addımları ABŞ–İran qarşıdurmasının artıq yalnız hərbi və siyasi deyil, həm də iqtisadi, nəqliyyat və enerji sahələrini əhatə edən daha geniş mərhələyə keçdiyini göstərir.
Xüsusilə Hörmüz boğazı ətrafında artan gərginlik beynəlxalq enerji bazarlarında və qlobal nəqliyyat marşrutlarında narahatlıqları artırıb. Ekspertlər bildirirlər ki, İran aviasiyasına qarşı mümkün məhdudiyyətlər Tehranın beynəlxalq logistika və iqtisadi əlaqələrinə ciddi təsir göstərə bilər.
Son aylarda ABŞ və İran arasında qarşılıqlı sanksiyalar, hərbi ritorika və regional qarşıdurmaların intensivləşməsi Yaxın Şərqdə təhlükəsizlik vəziyyətini daha da mürəkkəbləşdirib.
