BAKI,TurkicWorld,Yusif Şərifzadə
İsrailin Livanın cənubunda yaratdığı “təhlükəsizlik zonası” və sonradan elan etdiyi təxliyə əraziləri birlikdə ölkə ərazisinin təxminən beşdəbirini əhatə edir.
TurkicWorld xəbər verir ki, 16 aprel tarixində Livanla əldə olunan atəşkəsdən sonra İsrail təxminən 600 kvadratkilometr ərazini əhatə edən və quru qüvvələrinin nəzarətində saxladığı “təhlükəsizlik zonası”nı göstərən xəritə yayımlayıb.
Həmin xəritədə Livanın cənubunda yerləşən 57 şəhər və kənd qeyd olunub və sakinlərə əraziləri tərk etmək barədə xəbərdarlıq edilib.
İsrailin rəsmi açıqlamalarına əsasən, bundan sonra İsrail ordusu təhlükəsizlik zonasından xeyli uzaqda yerləşən ərazilərə yüzlərlə hava hücumu həyata keçirib. Bununla yanaşı, əlavə olaraq 100-dən çox yaşayış məntəqəsi üçün məcburi köçürülmə əmrləri verilib.
Məlumata əsasən, işğal altında saxlanılan təhlükəsizlik zonası və sonradan elan edilən təxliyə əraziləri birlikdə Livanın təxminən 2 min kvadratkilometr ərazisini əhatə edir. Bu isə ölkə ərazisinin təxminən 20 faizinə bərabərdir.
Nəticədə həmin ərazilərin Livan sakinləri üçün faktiki olaraq “giriş qadağan edilmiş zona”ya çevrildiyi bildirilir.
Son aylarda İsrail və Hizbullah arasında davam edən qarşıdurmalar fonunda Livanın cənubunda təhlükəsizlik vəziyyəti daha da gərginləşib. Beynəlxalq təşkilatlar isə bölgədə humanitar vəziyyətin ağırlaşması ilə bağlı narahatlıqlarını davam etdirirlər.
