BAKI, TurkicWorld, Orxan Qədirzadə
Yaxın Şərqdə gərginliyin artdığı bir vaxtda İraqın müxtəlif bölgələri, o cümlədən strateji əhəmiyyətli hərbi və mülki infrastruktur obyektləri yenidən hücumlara məruz qalıb.
TurkicWorld xəbər verir ki, çərşənbə günü İraqın qərbindəki Ənbar əyalətində yerləşən nəzarət-buraxılış məntəqəsinə endirilən hava zərbəsi nəticəsində "Həşd əş-Şaabi" (Xalq Səfərbərlik Qüvvələri) koalisiyasının iki döyüşçüsü həlak olub, daha dörd nəfər yaralanıb. Koalisiya rəsmiləri hadisəyə görə ABŞ və İsraili ittiham edərək hücumu "mənfur cinayət" adlandırıblar. Hazırda İraq ordusunun tərkib hissəsi hesab olunan bu alyans regional münaqişənin mərkəzində qalmaqda davam edir.
Gərginlik təkcə ölkənin qərbi ilə məhdudlaşmayıb. İraq Kürdüstan Regional Rəhbərliyinin paytaxtı Ərbil şəhərində beynəlxalq hava limanı yaxınlığında endirilən zərbənin hava hücumundan müdafiə sistemləri tərəfindən zərərsizləşdirildiyi bildirilir. Hadisə şahidlərinin sözlərinə görə, zərərsizləşdirilən qurğunun qalıqları hava limanı yaxınlığındakı evlərə və avtomobillərə ziyan vurub. Qeyd edək ki, Ərbil hava limanı ABŞ-ın başçılıq etdiyi İŞİD əleyhinə koalisiyanın hərbi məsləhətçilərinə ev sahibliyi edir.
Eyni zamanda, Süleymaniya əyalətində yerli silahlı qüvvələrin yerləşdiyi baza raket hücumuna məruz qalıb. Regional qüvvələrin yaydığı məlumata görə, bu hücum nəticəsində tələfat qeydə alınmayıb.
Münaqişə İraqın iqtisadiyyatına, xüsusilə neft sektoruna da mənfi təsir göstərir. Ölkənin cənubunda bir pilotsuz uçuş aparatının (PUA) neft yataqlarından birinə düşdüyü, lakin partlayışın baş vermədiyi bildirilir. Müharibənin başladığı dövrdən etibarən İraqda bir çox neft əməliyyatları təhlükəsizlik səbəbindən dayandırılıb.
Xatırladaq ki, İraq 28 fevral 2026-cı ildə ABŞ və İsrailin İrana qarşı başlatdığı zərbələrdən sonra genişmiqyaslı regional müharibənin poliqonuna çevrilib. Bölgədəki iranpərəst qruplar ABŞ maraqlarını hədəf alacağını bəyan etsələr də, bu qrupların özləri də intensiv cavab zərbələrinə məruz qalırlar.
