BAKI,TurkicWorld
Birləşmiş Millətlər Təşkilatının ən ali məhkəmə instansiyası olan Beynəlxalq Ədalət Məhkəməsində Myanmara qarşı rohinca müsəlmanlarına qarşı soyqırımı ittihamı üzrə məhkəmə prosesi başlayıb.
TurkicWorld xəbər verir ki, iş çərçivəsində Myanma hakimiyyəti rohinca icmasına qarşı kütləvi qətllər, zorlamalar və sistemli təqiblərdə ittiham olunur. İddialara əsasən, təhlükəsizlik qüvvələrinin əməliyyatları minlərlə insanın ölümünə, yüz minlərlə rohincanın isə ölkəni tərk etməsinə səbəb olub.
Myanma tərəfi ittihamları rədd edərək bildirib ki, həyata keçirilən tədbirlər terrorçu qruplara qarşı qanuni antiterror əməliyyatları olub və mülki əhaliyə qarşı soyqırımı məqsədi daşımayıb.
Bu məhkəmə prosesi rohincalara qarşı zorakılıqlarla bağlı beynəlxalq səviyyədə ən mühüm hüquqi proseslərdən biri hesab olunur. İşin gedişi beynəlxalq hüquqda dövlətlərin məsuliyyəti və soyqırımı anlayışının tətbiqi baxımından presedent yarada bilər.
Qeyd edək ki, rohinca böhranı son illərdə Cənub-Şərqi Asiyada ən ağır humanitar fəlakətlərdən biri kimi qiymətləndirilir.
