BAKI, TurkicWorld
Litvada NATO təlimləri zamanı itkin düşən ABŞ əsgərləri ölü tapılıb.
TurkicWorld AzerVoice-ə istinadən xəbər verir ki, ABŞ Avropa və Afrika Komandanlığı rəsmi açıqlama yayaraq, M88A2 Hercules zirehli xilasetmə maşınının bataqlığa düşdüyünü və içərisində olan 3 əsgərin cəsədinin aşkar edildiyini bildirib. İtkin düşən dördüncü əsgərin axtarışları davam edir.
Hadisə martın 25-də 3-cü Piyada Diviziyasının 1-ci Zirehli Briqada Döyüş Komandasının taktiki avtomobili yedəkləməyə çalışdığı zaman baş verib. Hadisədən bir gün sonra 63 ton ağırlığında olan hərbi maşın su və palçığa batmış vəziyyətdə tapılıb. Axtarış əməliyyatına ABŞ, Litva və Polşa qüvvələri ilə yanaşı, ABŞ Hərbi Dəniz Qüvvələrinin dalğıcları da cəlb olunub.
Qeyd edək ki, ABŞ ordusu mütəmadi olaraq NATO müttəfiqləri ilə Litvada birgə hərbi təlimlər keçirir.
