Bakı, TurkicWorld
ABŞ prezidenti Donald Tramp Qəzza sakinlərinin köçürülməsi ilə bağlı təklifini irəli sürərək bu məsuliyyəti İsrailin və Baş nazir Benyamin Netanyahunun üzərinə qoyub.
TurkicWorld xəbər verir ki, Tramp bəyan edib ki, münaqişə bitdikdən sonra İsrail Qəzzanı ABŞ-a təslim edəcək.
Beynəlxalq ictimaiyyətin və BMT-nin sərt reaksiyasına baxmayaraq, Tramp öz mövqeyini qoruyub saxlayıb. Bununla belə, o, bu prosesin “Amerika qoşunlarının yerləşdirilməsini tələb etmədiyini” vurğulayıb.
Trampın bəyanatı hətta onun administrasiyasında da qarışıqlıq yaradıb. Ağ Ev sözçüsü və digər yüksək rütbəli məmurlar prezidentin sözlərini yumşaltmağa çalışıblar.
İsrailin sağ qanadı Trampın planını alqışlasa da, keçmiş baş nazir Ehud Barak bunu “xəyali” adlandırarkən, Misir Xarici İşlər Nazirliyi Qəzzada atəşkəsin üç mərhələdə həyata keçirilməli olduğunu vurğulayıb.
Fələstinlilər isə köçürülməmişdən əvvəl bərpa və yenidənqurma prosesinə başlanılmasını tələb edib.
