Daşkənd. TurkicWorld
Tacikistan və Özbəkistan 2028-ci ilədək ticarət dövriyyəsini 2 milyard dollara çatdırmağı planlaşdırır.
TurkicWorld-ün xüsusi müxbirinin çərşənbə günü verdiyi məlumata görə, bunu Tacikistanın baş naziri Kohir Rəsulzadə 5-ci Daşkənd Beynəlxalq İnvestisiya Forumunun — TIIF 2026-nın açılışında bildirib.
"Ölkələrimizin liderləri — Emoməli Rəhmon və Şavkat Mirziyoyevin uzaqgörən siyasəti və möhkəm iradəsi sayəsində dövlətlərimiz arasındakı sərhədlər dostluq körpülərinə, iqtisadi məkan isə genişmiqyaslı birgə təşəbbüslərin həyata keçirilməsi üçün platformaya çevrilib. İnvestisiyaların cəlb olunması üçün güzəştlər, preferensiyalar və əlverişli şərtlərlə yanaşı, dövlət liderlərinin siyasi iradəsi də böyük əhəmiyyət daşıyır", — deyə o bildirib.
Rəsulzadə qeyd edib ki, Tacikistan və Özbəkistan arasında ticarət dövriyyəsi qısa müddət ərzində 70 milyon dollardan 1 milyard dollara yüksəlib.
"Bu gün hökumətlər qarşısında 2028-ci ilədək bu göstəricini 2 milyard dollara çatdırmaq vəzifəsi qoyulub", — deyə o əlavə edib.
Baş nazir həmçinin bildirib ki, iki ölkə arasında avtomobil nəqliyyatı ilə yükdaşımaların həcmi 100 dəfə artıb.
Daha sonra Rəsulzadə qeyd edib ki, hazırda 530 birgə müəssisə fəaliyyət göstərir və bu göstərici hər il artır.
"Bütün bunlar əlavə olaraq yüz minlərlə yeni iş yerinin yaradılmasına, iki qardaş xalqın rifahının və həyat səviyyəsinin yaxşılaşmasına imkan verib. Bu gün Tacikistanda Özbəkistan kapitalının iştirakı ilə 130-dan çox müəssisə fəaliyyət göstərir. Eyni zamanda, Özbəkistanda Tacikistan investisiyaları ilə fəaliyyət göstərən şirkətlərin sayı artıq 410-u keçib. Tərəfdaşlığımız keyfiyyətcə yeni səviyyəyə yüksəlib. Bu tendensiyanın ən parlaq təsdiqi ondan ibarətdir ki, bu günədək Tacikistanın özəl sektoru Özbəkistanda təxminən 2 milyard dollar məbləğində investisiya layihələri həyata keçirir", — deyə o bildirib.
Rəsulzadə son illərdə Tacikistanın iqtisadi nailiyyətləri barədə də danışıb.
"2025-ci ilin yekunlarına əsasən, ölkədə ÜDM-in artımı 8,4 faiz təşkil edib. Cari 2026-cı ildə biz bu göstəricini 8 faiz səviyyəsində saxlayırıq. Ötən il Tacikistan iqtisadiyyatına təxminən 7 milyard dollar xarici investisiya cəlb olunub ki, bu da əvvəlki illə müqayisədə 35 faiz çoxdur. Bizə maraq bütün istiqamətlərdən artır. MDB ölkələrindən investisiyalar 54 faiz, uzaq xaric ölkələrindən isə 23 faizdən çox artıb", — deyə baş nazir bildirib.
Rəsulzadənin sözlərinə görə, Tacikistanın əsas və danılmaz üstünlüyü iqtisadiyyatının tamamilə "yaşıl" əsaslara söykənməsidir.
"Biz elektrik enerjisinin 98 faizini hidroelektrik stansiyalarından əldə edirik və bu göstəriciyə görə dünya liderləri arasında ilk altılığa daxilik. 2032-ci ilədək karbon izimizin sıfıra endirilməsi planlaşdırılır. Ekoloji standartların hər gün daha da sərtləşdiyi dünyada Tacikistan investorlara yüz faiz ‘yaşıl’ sertifikata malik məhsullar yaratmaq üçün unikal imkan verir", — deyə o əlavə edib.
Qeyd edək ki, iyunun 16-da Özbəkistanın paytaxtında 5-ci yubiley Daşkənd Beynəlxalq İnvestisiya Forumu — TIIF 2026 işə başlayıb. Forum investorlar, dövlət qurumları və beynəlxalq maliyyə təşkilatları arasında dialoq üçün mühüm platformaya çevrilib.
Yubiley forumu təkcə əvvəlki uğurları möhkəmləndirməyi deyil, həm də iştirakçıların coğrafiyasını genişləndirməyi, sahələr üzrə ixtisaslaşmanı dərinləşdirməyi və tədbirlərin praktiki yönümünü gücləndirməyi hədəfləyir. Bu gün TIIF beynəlxalq kapitalın etimad göstəricisi və Özbəkistanın qlobal əlavə dəyər zəncirlərinə inteqrasiyası üçün mühüm platforma hesab olunur.
