Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) və onun Qlobal Torpaq Tərəfdaşlığı (GSP) Özbəkistan Respublikasının Kənd Təsərrüfatı Nazirliyi və bir sıra tərəfdaşlarla birgə Daşkənddə “Rekarbonizasiya” layihəsinin işə salınması ilə bağlı təqdimat seminarı keçirib.
TurkicWorld xəbər verir ki, təşəbbüs Qlobal Ətraf Mühit Fondu tərəfindən maliyyələşdirilən FAO-nun Özbəkistandakı digər iki layihəsi ilə birgə həyata keçiriləcək.
Məlumata əsasən, seminarın əsas məqsədi iştirakçılara RECSOIL təşəbbüsü fəaliyyətləri haqqında məlumat vermək və müvafiq nazirliklər, idarələr və elmi-texniki qurumlar arasında potensial layihə tərəfdaşlarını müəyyən etməkdir. Xüsusilə iştirakçılara RECSOIL alətlərinin torpağın deqradasiyası üzrə neytrallığa nail olunmasına necə töhfə verəcəyi barədə məlumat verilmişdir.
Seminar zamanı həmçinin Özbəkistanda RECSOIL-ın tətbiqi üzrə tədbirlər planı hazırlanıb və razılaşdırılıb.
Qeyd edək ki, RECSOIL təşəbbüsü torpağın sağlamlığını artırmaq, beləliklə də torpaqları daha məhsuldar və zərbələrə davamlı etmək üçün davamlı torpaq idarəçiliyini (SSM) təşviq etməklə iqlim dəyişikliyi və davamlılıq problemlərini həll edir. Mexanizm əsas diqqəti örtülü bitkilər, əkin dövriyyəsi və aqromeşəçilik kimi SSM təcrübələrini qəbul etməklə torpaq karbon ehtiyatlarının saxlanmasına və ya yaxşılaşdırılmasına yönəldir. RECSOIL təşəbbüsü karbon sekvestrasiyası və istixana qazı (İQ) emissiyalarının azaldılmasına yönəlib.
