BAKI, TurkicWorld, Orxan Qədirzadə
Türkiyənin daxili işlər naziri Mustafa Çiftçinin rəhbərliyi ilə keçirilən Sərhəd Təhlükəsizliyi İclasında qeyri-qanuni miqrasiya, hudud mühafizəsi və mümkün böhran ssenariləri geniş şəkildə müzakirə edilib.
TurkicWorld xəbər verir ki, nazirlik regional proseslərin qlobal təsirlərini qiymətləndirərək, bütün müvafiq qurumların tam hazır vəziyyətə gətirildiyini bəyan edib.
İclas zamanı sərhəd təhlükəsizliyinin ən yüksək səviyyədə təmin edilməsi, nizamsız miqrasiyaya qarşı əlavə tədbirlərin görülməsi və fövqəladə hallarda tətbiq olunacaq fəaliyyət planları nəzərdən keçirilib. Nazir Mustafa Çiftçi Türkiyənin sərhəd mühafizəsi, ictimai asayiş və miqrasiya idarəçiliyi mövzusunda qətiyyətli siyasət yürütdüyünü vurğulayıb. O, bütün bölmələrin baş verən hadisələri anbaan izlədiyini və yüksək hazırlıq vəziyyətində olduğunu bildirib.
Müzakirələrdə qurumlararası koordinasiyanın gücləndirilməsi və sahədəki təhlükəsizlik imkanlarının artırılması əsas prioritetlər kimi müəyyən edilib. Videokonfrans formatında keçirilən toplantıya Van, İğdır, Hakkari və Ağrı valiləri ilə yanaşı, Polis Baş İdarəsi, Jandarma Baş Komandanlığı, Sahil Mühafizəsi, Miqrasiya İdarəsi və AFAD nümayəndələri qatılıblar. Türkiyə Daxili İşlər Nazirliyi sərhədlərin toxunulmazlığı və daxili sabitliyin qorunması istiqamətində işlərin qətiyyətlə davam etdiriləcəyini qeyd edib.
