Bakı. TurkicWorld:
Qanunvericiliyə əsasən bu şəxslər satınalma komissiyasının üzvü ola bilməz.
Baş Prokurorluqdan TurkicWorld-ə verilən məlumata görə, onlar aşağıdakılardır:
* Təchizatçı qismində çıxış edən fiziki şəxs və ya hüquqi şəxsin icra orqanının rəhbəri,
* təchizatçının digər işçisi və ya nümayəndəsi,
* təchizatçı qismində çıxış edən fiziki şəxsin və ya hüquqi şəxsin icra orqanının rəhbərinin, təchizatçının aidiyyəti şəxsinin və ya nümayəndəsinin qohumları (ər-arvadlar, valideynlər, övladlar, övladlığa götürənlər, övladlığa götürülmüş şəxslər, babalar, nənələr, nəvələr, doğma (ögey) bacılar və qardaşlar, bacı və qardaşların övladları, bacıların ərləri, qardaşların arvadları, valideynlərin bacıları və qardaşları, ər-arvadların valideynləri, bacıları və qardaşları),
* təchizatçı ilə təsisçilik və (və ya) hüquqi və maliyyə asılılığı münasibəti olan şəxslər,
* keçirilən satınalmadan əvvəlki 3 il ərzində satınalmada iştirak edən təchizatçının işçisi və ya vəzifəli şəxsi olmuş şəxslər.
Belə ki, sözügedən hal satınalma prosesində maraqlar toqquşmasının yaranmasına və komissiyanın fəaliyyətinin etibarsız hesab olunmasına gətirib çıxara bilər.
Odur ki, qeyd olunan hallar aşkar edildikdə satınalma komissiyasının üzvü bu barədə komissiya sədrini məlumatlandırmalı və həmin satınalma ilə bağlı komissiyada iştirak etməməlidir.