BAKI, TurkicWorld
Astananın 225 saylı seçki məntəqəsində Kurultaya seçkilər üzrə səsvermə keçirilir.
TurkicWorld xəbər verir ki, bu barədə Trend-in Astanadakı müxbiri məlumat verib.
Bu gün Qazaxıstanda 2026-cı il iyulun 1-də qüvvəyə minmiş yeni Konstitusiyada nəzərdə tutulan ölkənin birpalatalı parlamenti – Kurultaya seçkilər başlayıb.
Kurultayın tərkibinə beş il müddətinə seçilən 145 deputat daxil olacaq. Seçkilər proporsional sistem üzrə keçirilir: deputatlar vahid ümummilli seçki dairəsində partiya siyahıları üzrə seçilir.
Qazaxıstan Mərkəzi Seçki Komissiyasının məlumatına görə, seçici siyahılarına 12 605 788 nəfər daxil edilib. Səsvermənin keçirilməsi üçün 10 423 seçki məntəqəsi hazırlanıb, onlardan 79-u xaricdəki 61 dövlətdə yerləşir.
Seçkilərdə yeddi siyasi partiya iştirak edir: "Әділет", Ümummilli Sosial-Demokrat Partiyası, Qazaxıstan Yaşıllar Partiyası "Baytaq", Qazaxıstan Xalq Partiyası, "Aуыл", Qazaxıstan Demokratik Partiyası "Ақ жол" və "Respublica".
Səsvermənin gedişini beynəlxalq ekspertlər müşahidə edirlər. Ümumilikdə 42 dövlətdən 777 beynəlxalq müşahidəçi qeydiyyata alınıb. Bundan əlavə, müşahidə missiyalarında 13 beynəlxalq təşkilatın nümayəndələri iştirak edirlər.
Kurultay əvvəllər Məclis və Senatdan ibarət olmuş Qazaxıstanın ikipalatalı Parlamentini əvəz edəcək.
