BAKI, TurkicWorld
Orta Dəhlizin Çin-Qırğızıstan-Özbəkistan dəmir yolu və perspektivli Trans-Əfqanıstan dəhlizi ilə birləşdirilməsi geniş regionumuzda kompleks, çoxsahəli strateji magistral sisteminin yaradılmasına imkan verəcək.
TurkicWorld xəbər verir ki, bunu Qəbələdə keçirilən TDT Dövlət Başçıları Şurasının 12-ci Sammiti zamanı Özbəkistan Prezidenti Şavkat Mirziyoyev bəyan edib.
"Biz Orta Dəhlizin davamlı inkişafına dair bütün planları tam dəstəkləyirik. Əsas vəzifə onun rəqabət qabiliyyətinin təmin edilməsidir: dəhliz biznes ictimaiyyəti üçün maksimal dərəcədə əlverişli şərait yaratmalıdır",- deyə dövlət başçısı vurğulayıb.
O əlavə edib ki, bu baxımdan optimal tranzit tariflərinin tətbiqi, müasir nəqliyyat infrastrukturunun inkişafına yönəlmiş layihələrin həyata keçirilməsi və rəqəmsal gömrük prosedurlarının tətbiqi xüsusi əhəmiyyət daşıyır.
