BAKI,TurkicWorld
İraqın neft naziri Bəssəm Məhəmməd Xədir Hörmüz boğazından keçən neft tankerlərinin böyük hissəsinin İraq donanmasına aid olduğunu bildirib. Bağdad eyni zamanda sentyabr ayında neft ixracında yüksək göstəricilər qeydə alındığını açıqlayıb.
TurkicWorld xəbər verir ki, Bəssəm Məhəmməd Xədir İraqın sentyabr ayında bir gün ərzində 4 milyon barel neft ixrac etdiyini, bu ay üzrə gündəlik orta ixrac həcminin isə 2,6 milyon barel təşkil etdiyini deyib.
İraq rəsmisinin sözlərinə görə, ölkənin neft ixracının əhəmiyyətli hissəsi Hörmüz boğazından keçən dəniz marşrutlarından asılıdır.
ABŞ-ın maliyyə naziri Skott Bessent sentyabrın əvvəlində Hörmüz boğazından gündə ən azı 10 milyon barel neft keçdiyini bildirmişdi.
ABŞ və İsrailin İrana hücumundan əvvəl isə strateji su yolundan gündə təxminən 20 milyon barel neftin daşındığı təxmin edilirdi.
Hörmüz boğazı Fars körfəzi ölkələrinin dünya enerji bazarlarına çıxışında əsas dəniz marşrutlarından biridir. Boğazda gəmiçiliklə bağlı məhdudiyyətlər və təhlükəsizlik məsələləri neft tədarükünə və beynəlxalq enerji bazarlarına birbaşa təsir göstərə bilər.
Hazırkı vəziyyətdə boğazın statusu İran müharibəsinin dayandırılması istiqamətində aparılan diplomatik səylərdə müzakirə olunan əsas məsələlərdən biri olaraq qalır.
