BAKI,TurkicWorld,Yusif Şərifzadə
ABŞ Hərbi Dəniz Qüvvələrinin müşayiəti ilə Hörmüz boğazından həyata keçirilən gizli neft daşımalarının son yeddi günlük orta göstəricisi yüksəlməkdə davam edir. Bunu ABŞ-nin energetika naziri Kris Rayt bildirib.
TurkicWorld xəbər verir ki, Kris Rayt BMT-nin nüvə nəzarəti qurumunun toplantısında çıxışı zamanı son yeddi gün üzrə hesablanan orta göstəricinin artdığını və bu tendensiyanın davam edəcəyini deyib.
ABŞ rəsmisinin sözlərinə görə, sentyabrın 1-də Hörmüz boğazından daşınan neftin gündəlik həcminin əvvəlcə 17 milyon barel olduğu hesablanıb. Lakin sonradan bir tankerin hesablamaya daxil edilmədiyi müəyyənləşib.
Rayt bildirib ki, həmin gəminin yükü də nəzərə alındıqda sentyabrın 1-də boğazdan daşınan neftin həcmi təxminən 18 milyon barelə çatıb.
Hörmüz boğazında gəmiçiliyə nəzarət məsələsi İranla ABŞ və İsrail arasında yeddinci ayına daxil olan müharibənin dayandırılması istiqamətində aparılan, lakin hazırda dalana dirənmiş danışıqlarda əsas fikir ayrılıqlarından biri olaraq qalır.
Strateji boğaz dünya enerji daşımaları baxımından mühüm əhəmiyyət daşıdığından buradakı vəziyyət neft təchizatı və beynəlxalq enerji bazarlarının diqqət mərkəzindədir.
