BAKI, TurkicWorld Orxan Qədirzadə
Suriyanın şimal və şərqində 10 ildən artıq davam edən faktiki vəziyyətin sona çatdığı açıqlanıb. SDQ-nin məsul şəxsi Fərhat Abdi Şahin təşkilatın Suriya dövlətinin hərbi, təhlükəsizlik və inzibati strukturlarına inteqrasiyasının başa çatdığını bildirib.
Qamışlı şəhərində keçirilən mərasimdə çıxış edən Şahin 29 yanvarda başlayan prosesin tamamlandığını və yeni mərhələyə keçildiyini elan edib. O, Kürd əhalisinin hüquqlarının Suriya Konstitusiyasında rəsmiləşdirilməsi istiqamətində siyasi səylərin davam etdiriləcəyini bildirib.
Şahinin sözlərinə görə, SDQ və Asayiş qüvvələrinin Suriya Müdafiə və Daxili İşlər nazirliklərinə inteqrasiyası başa çatıb. O, PKK üzvlərinin Suriyanı tərk etdiyini, həmçinin bölgədən kənardan SDQ-yə dəstək üçün gələn silahlı qüvvələrin razılaşma çərçivəsində geri çəkildiyini açıqlayıb.
Bununla yanaşı, əvvəlki “Muxtar İdarə”nin nəzarətində olan ərazilərdə Suriya dövlətinə bağlı yeni qurumların yaradıldığı, mövcud strukturların isə fəaliyyətini davam etdirəcəyi bildirilib.
Suriyanın Həsəkə əyaləti üzrə inteqrasiyaya nəzarət edən nümayəndə Əhməd əl-Hilali bu addımın SDQ-nin silahlı qanadı olan YPG-nin də ləğvini qəbul etməsi anlamına gəldiyini deyib. O, prosesin ölkənin ərazi bütövlüyünün və mərkəzi hakimiyyətin bərpası istiqamətində mühüm mərhələ olduğunu vurğulayıb.
