BAKI,TurkicWorld,Yusif Şərifzadə
Avropa İttifaqının xarici işlər nazirləri işğal olunmuş İordan çayının qərb sahilində yerləşən İsrail yaşayış məntəqələri ilə ticarətin məhdudlaşdırılması üçün mümkün yeni tədbirləri müzakirə ediblər.
TurkicWorld xəbər verir ki, Avropa İttifaqı xarici işlər nazirlərinin Brüsseldə keçirilən görüşündə İsrail yaşayış məntəqələrindən idxala qarşı yeni addımlar üçün kifayət qədər dəstəyin olub-olmaması müzakirə olunub.
Məlumata görə, müzakirələr Avropa Komissiyasının hazırladığı məxfi sənədə əsaslanır. Sənəddə qeyri-qanuni hesab edilən İsrail yaşayış məntəqələri ilə ticarətə məhdudiyyət qoyulması üçün üç mümkün variant irəli sürülür.
Bu variantlar arasında məhsullar üçün xüsusi idxal icazəsi sisteminin tətbiqi, yüksək gömrük rüsumlarının müəyyən edilməsi və həmin ərazilərdən məhsulların idxalına qadağa qoyulması yer alır.
Avropa İttifaqı uzun illərdir Yaxın Şərq siyasəti ilə bağlı mühüm qərarların qəbulunda çətinliklərlə üzləşir. Buna əsas səbəb quruma üzv 27 ölkə arasında, xüsusilə İsrail-Fələstin münaqişəsi məsələsində mövcud olan fikir ayrılıqlarıdır.
Mümkün yeni tədbirlər Avropa İttifaqının İsrail-Fələstin məsələsində mövqeyinin sərtləşməsi kimi qiymətləndirilə bilər. Lakin qərarın qəbul edilməsi üçün üzv dövlətlər arasında razılığın əldə olunması tələb olunur.
