BAKI,TurkicWorld
Qaz anbarlarında ehtiyatların səviyyəsinin əvvəlki illərlə müqayisədə aşağı olmasına baxmayaraq, Avropa İttifaqının (Aİ) qaz sistemi qışa hazırdır.
Bu barədə Avropa Komissiyasının saytında dərc olunan məlumatda bildirilib.
Məlumata görə, Avropanın qaz bazarındakı mövcud vəziyyəti qiymətləndirmək üçün Qaz Təchizatının Əlaqələndirilməsi Qrupu bu yaxınlarda növbəti iclasını keçirib.
İclasda Avropa Qaz Ötürmə Sistemi Operatorları Şəbəkəsinin (ENTSOG) 2026–2027-ci illərin qış mövsümünə hazırlıqla bağlı proqnozunun əsas nəticələri də təqdim olunub.
Avropa Komissiyasının məlumatında qeyd edilib ki, qaz ehtiyatları tarixi göstəricilərdən aşağı olsa da, hesabat Aİ-nin qaz sisteminin bu qış tələbatı ödəmək üçün kifayət qədər çevik imkanlara malik olduğunu təsdiqləyir. Aİ-nin infrastrukturu mayeləşdirilmiş təbii qazın (LNG) idxalını artırmağa və anbarlardakı ehtiyatların aşağı səviyyəsini kompensasiya etməyə imkan verir.
ENTSOG qışın sonlarında havaların soyuması ilə əlaqədar tələbatın ödənilməsi və növbəti yay mövsümündə anbarların doldurulmasının asanlaşdırılması üçün bütün qış boyunca kifayət qədər qaz ehtiyatının qorunmasının vacibliyini də vurğulayıb.
Bildirilib ki, hazırkı vəziyyət 2021–2022-ci illərin qışından əhəmiyyətli dərəcədə fərqlənir. Qaz təchizatı mənbələrinin şaxələndirilməsi, LNG idxalı imkanlarının genişləndirilməsi və qaza tələbatın azaldılması sayəsində Aİ hazırda qış mövsümünə daha yaxşı hazırdır.
Avropa Komissiyası vurğulayıb ki, Aİ-yə LNG idxalının həcmi əsasən qışda havanın temperaturundan və bunun qaza olan tələbatı necə dəyişməsindən asılı olacaq. LNG idxal etmək və ya qaz anbarlarından istifadə etmək barədə yekun qərarı bazar iştirakçıları verirlər.
Bundan əlavə, Avropa Komissiyası qazla bağlı "REPowerEU" Qaydasının icrası barədə məlumat təqdim edib. Xüsusilə, gələn ilin əvvəlindən Rusiyadan LNG idxalına dair uzunmüddətli müqavilələrin qüvvəsinin başa çatmasına hazırlıq məsələlərinə diqqət yetirilib.
Avropa Komissiyası qış mövsümü boyunca Aİ ölkələri və bazar iştirakçıları ilə əməkdaşlıq çərçivəsində qaz ehtiyatlarının səviyyəsini, tədarük həcmlərini və qiymətləri diqqətlə izləməyə davam edəcək.
