BAKI, TurkicWorld, Orxan Qədirzadə
ABŞ-ın İsraildəki səfiri Mayk Hakabi İran rəhbərliyinin ABŞ ordusunun iyun ayında Fordo nüvə obyektinə endirdiyi zərbənin “lazımi mesajını tam şəkildə almadığını” bildirib.
TurkicWorld-un məlumatına görə, Hakabi bu fikirləri İsrail Milli Təhlükəsizlik Araşdırmaları İnstitutuna verdiyi müsahibədə səsləndirib.
ABŞ ordusunun 22 iyunda Fordo nüvə obyektinə endirdiyi hava zərbəsini xatırladan səfir bildirib ki, Tehranın yenidən bərpa işlərinə cəhd etməsi mesajın tam mənimsənilmədiyini göstərir. Onun sözlərinə görə, İran tərəfi obyektləri daha dərin və daha təhlükəsiz hala gətirməyə çalışır.
Hakabi İranın nüvə proqramının təkcə İsrail və ABŞ üçün deyil, Avropa üçün də ciddi təhlükə olduğunu iddia edərək, Avropanın bu riski yetərincə dərk etmədiyini bildirib. ABŞ səfiri bu mövzuda Avropa paytaxtlarını sərt şəkildə tənqid edib.
Suriya ilə İsrail arasında aparılan və hazırda dalana dirənən təhlükəsizlik danışıqlarına da toxunan Hakabi, İsrail və Suriya arasında razılaşmanın mümkün olduğunu bildirib. Onun sözlərinə görə, Suriya prezidenti Əhməd əş-Şəraa ölkədə sabitliyin və hakimiyyətin davamlılığının İsrail ilə sülh şəraitində yaşamaqdan keçdiyini anlayır.
ABŞ səfiri İsrailin Suriyanı işğal etmək niyyətində olmadığını iddia edərək, İsrail ordusunun tampon zonanı yalnız təhlükəsizlik məqsədi ilə nəzarətə götürdüyünü qeyd edib.
Qeyd edək ki, ABŞ İsrailə dəstək çərçivəsində 22 iyunda İranın Natanz, Fordo və İsfahan şəhərlərində yerləşən üç nüvə obyektinə hava zərbələri endirib.
