Bakı, TurkicWorld
Su çatışmazlığı və quraqlıq Amazon regionunda 420 mindən çox uşağa ciddi təsir edib.
TurkicWorld xəbər verir ki, Birləşmiş Millətlər Təşkilatının Uşaq Fondunun (UNICEF) məlumatına görə, keçən ildən bəri davam edən quraqlıq, Amazon hövzəsi çaylarının tarixdə ən aşağı səviyyəsinə enməsinə səbəb olub. Bu isə, Braziliya, Kolumbiya və Peru ölkələrindəki sahil icmaları və yerli əhalinin həyatını xeyli çətinləşdirib.
UNICEF CEO-su Katherine Russell bildirib ki, "əsas ekosistemin məhv edilməsi" nəticəsində bir çox uşaq adekvat qida, su, səhiyyə və təhsil imkanlarından məhrum qalıb. O vurğulayıb ki, "bugünkü uşaqları və gələcək nəsilləri qorumaq üçün ciddi iqlim böhranlarının təsirlərini azaltmalıyıq. Amazonun sağlamlığı hamımızın sağlamlığına təsir edir."
UNICEF-in məlumatına görə, Braziliyanın Amazon bölgəsindəki 700 mindən çox məktəb və 760 tibb mərkəzi su çatışmazlığı səbəbindən ya bağlanıb, ya da əlçatmaz vəziyyətdədir.
Kolumbiyada isə Amazon bölgəsində çayların səviyyəsi 80 faiz azalıb ki, bu da içməli su və qida əldə edilməsini çətinləşdirib və 130-dan çox məktəbin bağlanmasına səbəb olub.
Braziliyanın Milli Fəlakətlərin Monitorinqi Mərkəzi ölkə ərazisinin üçdə birindən çoxunun hazırda şiddətli quraqlıq yaşadığını bildirib. Mütəxəssislər bu vəziyyəti El Niño hava fenomeni və iqlim dəyişikliyinin təsirləri ilə əlaqələndirirlər.
