Bakı, TurkicWorld
Dünyanın ən təcrid olunmuş bölgələrindən biri olan Antarktida hazırda ölümcül quş qripi epidemiyası ilə üz-üzədir.
TurkicWorld xəbər verir ki, alimlər yüksək yoluxucu H5N1 virusunun bir ştammı olan "clade 2.3.4.4b" növünün ilk dəfə Antarktidada quşlar və məməlilər arasında aşkarlandığını bildiriblər.
Virus 2021-ci ildən etibarən Avropadan Cənubi Amerikaya qədər yayılaraq kütləvi heyvan ölümlərinə səbəb olub. İndi isə köçəri quşlar vasitəsilə Antarktidaya da çatdığı ehtimal edilir.
Xüsusilə albatroslar və pinqvinlər kimi bölgənin simvolik növləri bu virusun təhlükəsi altındadır. Epidemiya, Antarktidada nadir və nəsli kəsilməkdə olan quş və məməlilər üçün geri dönüşü olmayan bir fəlakətə çevrilə bilər. Antarktika ekosistemində belə bir yoluxucu xəstəliyin yayılması, bu ərazilərdəki heyvanlar üçün çox ciddi təhlükə yaradır.
Qeyd edək ki, epidemiya ilk dəfə 2023-cü ilin sentyabrında Cənubi Corciya adalarında nəhəng fırtına quşunun ölümü ilə başlamış və dekabr ayında daha da genişlənmişdir. Antarktikada hələlik rəsmi hallar qeydə alınmasa da, virusun artıq qitəyə çatdığı düşünülür.
2024-cü ilin mart ayında, xüsusən Adelie pinqvinləri və Antarktika qarabatatları arasında virus şübhəsi ilə tədqiqat başladıldı. Bu tapıntılar təsdiqlənərsə, H5N1-in çatmadığı yeganə qitə Avstraliya olaraq qalacaq.
Bu hallar, Antarktidanın təcrid olunmuş növləri üçün böyük təhlükə yaradır, çünki potensial olaraq bəzilərinin nəsli hazırda kəsilmək üzrədir.
