Bakı. TurkicWorld:
Türkiyə Milli Müdafiə Nazirliyi tərəfindən Kahramanmaraşda yaradılan Səyyar Səhra Xəstəxanasında Türkiyə Silahlı Qüvvələri və Azərbaycan Silahlı Qüvvələrinin hərbi həkimləri zəlzələdən zərər çəkənlərə sağlamlıq xidməti göstərirlər.
TurkicWorld-un məlumatına görə, bu barədə "TRT Haber"də dərc edilən məqalədə qeyd edilib.
Bildirilib ki, 19 konteyner və 21 çadırdan ibarət səyyar səhra xəstəxanasında Azərbaycandan 12-si hərbi həkim, 8-i tibb bacısı olmaqla 20 nəfər Türkiyə Silahlı Qüvvələrinin səhiyyə işçiləri ilə birgə çalışır.
Xəstəxanada 2 minə yaxın xəstə müayinə olunub, 85 cərrahi müdaxilə edilib.
Qeyd edək ki, fevralın 6-da Türkiyənin Kahramanmaraş vilayətinin Pazarcık rayonunda 7,7 bal, Elbistan rayonunda 7,6 bal gücündə iki zəlzələ baş verib. Dərinliyi 7 kilometr olan zəlzələ 10 vilayətdə ciddi dağıntılara səbəb olub. Zəlzələdən zərər çəkmiş 10 vilayətdə üç ay müddətinə fövqəladə vəziyyət rejimi elan olunub. Həmçinin Türkiyədə bir həftəlik matəm elan olunub.
