BAKI, TurkicWorld, Nailə Babazadə
Türkiyənin daxili işlər naziri Ali Yerlikaya, İstanbul mərkəzli 14 vilayətdə sosial media və anlıq mesajlaşma platformaları üzərindən narkotik ticarəti edənlərə qarşı keçirilən əməliyyatlarda 305 şübhəlinin yaxalandığını bildirib.
TurkicWorld xəbər verir ki, İstanbul Polis İdarəsinin Narkotik Cinayətkarlıqla Mübarizə Şöbəsi siber patrul qrupları ilə koordinasiyalı şəkildə apardığı 5 aylıq texniki və fiziki təqibdən sonra bu nəhəng əməliyyata imza atıb. İstanbul Respublika Baş Prokurorluğunun rəhbərliyi ilə narkotik ticarətini rəqəmsal platformalara daşıyan şəbəkələr tamamilə ifşa edilib.
Məlum olub ki, şübhəlilər polisin nəzarətinə düşməmək üçün mesajlaşma tətbiqlərində "ucdan-uca şifrəli" qapalı qruplar yaradıblar. Bu qruplara üzvlər yalnız xüsusi dəvət və ya referans əsasında qəbul edilib, narkotik təminatı isə "etibara əsaslanan kuryer şəbəkəsi" vasitəsilə həyata keçirilib. Kiber Cinayətkarlıqla Mübarizə Şöbəsi ilə birgə aparılan araşdırmalarda narkotik alverçilərinin tez-tez istifadəçi adlarını dəyişdikləri, telefon və şəxsiyyət məlumatlarını gizlədərək 24 saat ərzində ticarətlə məşğul olduqları müəyyən edilib.
Rəqəmsal platformalarda idarəçi və moderator kimi fəaliyyət göstərən şəxslərin kimliyi müəyyən edildikdən sonra əməliyyat üçün düyməyə basılıb. İstanbul başda olmaqla Ankara, İzmir, Bursa, Antalya, Konya, Sakarya, Tekirdağ, Hatay, Mardin, Adıyaman, Giresun, Kastamonu və Muş vilayətlərində eyni vaxtda keçirilən basqınlarda 305 şübhəli nəzarətə alınıb. Nazir Ali Yerlikaya narkotiklə mübarizənin bəşəriyyət naminə aparılan qlobal bir təhlükəsizlik məsələsi olduğunu vurğulayaraq, əməliyyatı həyata keçirən polis qüvvələrini təbrik edib və "zəhər tacirlərinə göz açdırmayacağıq" mesajını verib.
