Bakı. TurkicWorld:
Türkiyənin Akkuyu Atom Elektrik Stansiyasında qaldırma qabiliyyəti 390 ton olan ilk dairəvi körpü kranı istifadəyə verilib.
TurkicWorld-un məlumatına görə, kran ərazidə qaldırma və yerdəyişmə əməliyyatları ilə yanaşı, nüvə yanacağının reaktora yüklənməsinə cavabdeh olan xüsusi yükləmə maşınının iş sahəsinə çatdırılması və müxtəlif avadanlıqların daşınmasında da iştirak edəcək. Dirəkli kran Akkuyu AES-in 1-ci enerji blokunun istismar dövrünün bütün mərhələlərində istifadə olunacaq.
Dirək kranı kimi tanınan dairəvi körpü kranı reaktor bölməsinin ən vacib mexanizmlərindən biri hesab olunur.
Reaktor binasının yuxarı silindrik hissəsinə quraşdırılmış dairəvi rels yolu üzərində hərəkət edəcək kranın mexanizmi reaktor binasının mərkəzində istənilən nöqtədə daşıma əməliyyatlarını həyata keçirmək imkanı yaradır. Kranın yerləşdiyi mexanizm uzunluğu 41,5 metr olan körpü boyu da hərəkət edə bilir.
İstifadəyə hazırlıq zamanı 487,5 ton simulyasiya edilmiş yüklə, əsas nəqliyyat mexanizminin statik sınaqları aparılıb. Kranın bütün komponentlərinin ümumi çəkisi təxminən 500 tondur.
"Bu kran çoxmərhələli nüvə reaktorunun yığılması prosesində və sonrakı fiziki işə salınma mərhələlərində iştirak edəcək. Kran körpü, araba, sensor ekranlı idarəetmə şkafı, xüsusi reaktor kimi müxtəlif komponentlərdən ibarət mürəkkəb texnoloji strukturdur. İdarəetmə şkafları reaktor kamerasının təzyiq zonasından kənarda ayrıca otaqda quraşdırılıb. Burada həmişə olduğu kimi, qeyd etmək istərdim ki, bizim prioritetimiz təhlükəsizlikdir. Yalnız xüsusi təlim keçmiş və təcrübəli və sertifikatlı operatorlara bu tip kranlardan istifadə etməyə icazə verilir",- deyə AES-in tikinti işləri üzrə direktoru Sergey Butckikh bildirib.
Qeyd edək ki, Akkuyu Atom Elektrik Stansiyası 2010-cu il mayın 12-də Türkiyə və Rusiya prezidentləri arasında imzalanmış müqavilə çərçivəsində Türkiyənin Mersin vilayətinin Büyükeceli bölgәsindә tikilib.
2018-ci ilin aprel ayında birinci reaktorun, 2020-ci ilin iyun ayında ikinci reaktorun, 2021-ci ilin mart ayında üçüncü reaktorun, 2022-ci ilin iyun ayında isə sonuncu reaktorun təməli qoyulub.
Aprelin 27-də Atom Elektrik Stansiyasına ilk yanacaq yüklənib.
Ümumi gücü 4 min 800 meqavat olan dörd blokdan ibarət Akkuyuda dörd reaktorun bir il fərqlə istifadəyə verilməsi planlaşdırılır. Dörd reaktorun istismara verildiyi zaman ildə cəmi 35 milyard kilovat-saat elektrik enerjisi istehsal ediləcək və Türkiyənin elektrik enerjisinə ehtiyacının təxminən 10 faizini qarşılayacağı gözlənilir. AES ilə ildə 17 milyon ton karbon emissiyasının qarşısı alınacaq.
Aytac Süleymanova
Twitter: a_alieva_
