Bakı,TurkicWorld:
Türkiyənin Akkuyu Atom Elektrik Stansiyası ölkənin enerji sahəsində xaricdən asılılığını 5% azaldacaq, TurkicWorld xəbər verir ki, bu barədə Türkiyənin Enerji Strategiyaları və Siyasətləri Araşdırma Mərkəzinin (TESPAM) rəhbəri Oğuzhan Akyener bildirib.
"Bir ildən bir enerji hasil etməyə başlayacaq Akkuyu AES-in bloklarının işə salınması Türkiyənin enerji müstəqilliyini əldə etməsi istiqamətində atılan ən böyük addımlardan biridir. Türkiyənin xaricdən enerji asılılığının 2028-ci ildə 56 faizə, 2053-cü ildə isə 13 faizə endirilməsi nəzərdə tutulur", - deyə o əlavə edib.
Qeyd edək ki, Akkuyu Atom Elektrik Stansiyası 2010-cu il mayın 12-də Türkiyə və Rusiya prezidentləri arasında imzalanmış müqavilə çərçivəsində Türkiyənin Mersin vilayətinin Büyükeceli bölgәsindә tikilib.
2018-ci ilin aprel ayında birinci reaktorun, 2020-ci ilin iyun ayında ikinci reaktorun, 2021-ci ilin mart ayında üçüncü reaktorun, 2022-ci ilin iyun ayında isə sonuncu reaktorun təməli qoyulub.
Aprelin 27-də Atom Elektrik Stansiyasına ilk yanacaq yüklənib.
Ümumi gücü 4 min 800 meqavat olan dörd blokdan ibarət Akkuyuda dörd reaktorun bir il fərqlə istifadəyə verilməsi planlaşdırılır. Dörd reaktorun istismara verildiyi zaman ildə cəmi 35 milyard kilovat-saat elektrik enerjisi istehsal ediləcək və Türkiyənin elektrik enerjisinə ehtiyacının təxminən 10 faizini qarşılayacağı gözlənilir. AES ilə ildə 17 milyon ton karbon emissiyasının qarşısı alınacaq.
Ləman Əsədli
Lamanasadli01
