Bakı, TurkicWorld:
Türkiyənin Akkuyu Atom Elektrik Stansiyası ölkənin enerji təhlükəsizliyinin gücləndirilməsində mühüm rol oynayacaq, TurkicWorld DHA-ya istinadən xəbər verir ki, bu sözləri Ümumdünya Nüvə Assosiasiyasının rəhbəri Sama Bilbao-i-Leon Rusiya Dövlət Enerji Şirkəti Rosatom-a "Akkuyu AES-də yanacaq tədarükü mərasimi" üçün göndərdiyi video təbrik mesajında bildirib.
"Akkuyu sayəsində Türkiyə artıq rəsmi olaraq nüvə statusuna sahib olan ölkədir. Akkuyunun dörd blokununun da tamamlanmasından sonra ildə təxminən 35 milyard kilovat-saat karbonsuz elektrik enerjisi istehsal ediləcək və bu da Türkiyənin elektrik enerjisinə olan ehtiyacının təxminən 10 faizini qarşılayacaq. Şübhəsiz ki, Akkuyu 1-ci blokunun təxminən beş il ərzində tamamlanması beynəlxalq əməkdaşlığın göstəricisidir. Ümumdünya Nüvə Birliyi olaraq rifah səviyyəsini artırmaq üçün nüvə enerjisini seçən Türkiyəni alqışlayırıq", - deyə o qeyd edib.
Qeyd edək ki, Akkuyu Atom Elektrik Stansiyası 2010-cu il mayın 12-də Türkiyə və Rusiya prezidentləri arasında imzalanmış müqavilə çərçivəsində Türkiyənin Mersin vilayətinin Büyükeceli bölgәsindә tikilib.
2018-ci ilin aprel ayında birinci reaktorun, 2020-ci ilin iyun ayında ikinci reaktorun, 2021-ci ilin mart ayında üçüncü reaktorun, 2022-ci ilin iyun ayında isə sonuncu reaktorun təməli qoyulub.
Aprelin 27-də Atom Elektrik Stansiyasına ilk yanacaq yüklənib.
Ümumi gücü 4 min 800 meqavat olan dörd blokdan ibarət Akkuyuda dörd reaktorun bir il fərqlə istifadəyə verilməsi planlaşdırılır. Dörd reaktorun istismara verildiyi zaman ildə cəmi 35 milyard kilovat-saat elektrik enerjisi istehsal ediləcək və Türkiyənin elektrik enerjisinə ehtiyacının təxminən 10 faizini qarşılayacağı gözlənilir. AES ilə ildə 17 milyon ton karbon emissiyasının qarşısı alınacaq.
Ləman Əsədli
Lamanasadli01
