BAKI, TurkicWorld, Orxan Qədirzadə
Azərbaycanın sosial siyasətinin prioritet istiqamətlərindən biri olan inklüziv cəmiyyətin qurulması çərçivəsində həssas qrupların yaradıcı potensialının üzə çıxarılması prosesi sürətlənir.
TurkicWorld xəbər verir ki, Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi və onun regional filiallarına cari ilin ilk rübündə daha 77 yeni benefisiar qəbul olunub.
Birinci vitse-prezident Mehriban Əliyevanın təşəbbüsü ilə yaradılan bu mərkəzlər şəhid ailələri, əlilliyi olan şəxslər və aztəminatlı ailələrin üzvləri üçün geniş imkanlar açır. Hesabat dövründə Bakıdakı mərkəzə 37, "Qarabağ DOST Evi" filialına isə 40 nəfər cəlb edilib. Beləliklə, şəbəkə üzrə xidmətlərdən yararlananların ümumi sayı 317-yə yüksəlib ki, onlardan 172-si birbaşa Bakıdakı mərkəzin xidmətlərindən faydalanır.
Hazırda benefisiarlar rəqs, dulusçuluq, xalçaçılıq, musiqi və dərzilik daxil olmaqla 14 müxtəlif istiqamət üzrə peşəkar təlimlərə cəlb olunurlar. Mərkəzlərdə təkcə yaradıcılıq bacarıqları təkmilləşdirilmir, həm də iştirakçılara sosial-psixoloji və pedaqoji dəstək xidmətləri göstərilir. Yaradıcılıq uğurlarının cəmiyyətə təqdim edilməsi məqsədilə mütəmadi olaraq sərgilər və ustad dərsləri təşkil edilir ki, bu da həmin şəxslərin cəmiyyətə inteqrasiyasını təmin edən əsas mexanizmlərdən biridir.
