Bakı,TurkicWorld
19 dekabr 2024-cü il tarixində Bakı Dövlət Universiteti (BDU) Tələbə Həmkarlar İttifaqı Komitəsi (THİK) və “Gənclərin Maarifləndirilməsinə Dəstək” (GMD) İctimai Birliyinin birgə təşkilatçılığı ilə keçirilən “Karyerada Peşəkarlıq” Forumu keçirilib.
Bu barədə TurkicWorld-a “Gənclərin Maarifləndirilməsinə Dəstək” İctimai Birliyindən (GMD) məlumat verilib.
Tədbir Azərbaycan Respublikasının Dövlət Himninin səsləndirilməsiilə başlayıb. Keçirilən forumda Bakı Dövlət Universitetinin Humanitar məsələlər və gənclər siyasəti şöbəsinin müdiri Ramin Səmədov, Bakı Dövlət Universiteti THİK sədri Zöhrab Cavadzadə , “Gənclərin Maarifləndirilməsinə Dəstək” İctimai Birliyinin (GMD) sədri Aynurə Salmanlı Ələkbərli iştirak ediblər.
Tədbirdə iş dünyasının üç əsas istiqaməti – HR (İnsan Resursları), PR (İctimaiyyətlə Əlaqələr) və PM (Layihə İdarəçiliyi) sahələrinə toxunulub.
Tədbirdə hər üç sahə üzrə tanınmış mütəxəssislər çıxış ediblər:
• PR sahəsi üzrə: Urfan Orucov, Kontakt Home-un Yaradıcılıq və Art Dizayn şöbəsinin rəhbəri.
• PM sahəsi üzrə: İlkin Haxverdiyev, Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidmətinin Layihələrin İcrasında Nəzarət İdarəsində icraçı direktor müşaviri.
• HR sahəsi üzrə: Vəfa Əsədova, Azərsun Holding-in Təlim və İnkişaf üzrə baş mütəxəssisi.
Hər bir spiker öz sahəsindəki təcrübələrini bölüşərək iştirakçılara karyera planlaşdırılması, sahə seçimi və peşəkar inkişaf barədə dəyərli məsləhətlər veriblər.
Forum gənclərin gələcək karyera istiqamətlərini müəyyənləşdirmələrinə və seçdikləri sahənin üstünlükləri və çağırışları haqqında daha ətraflı məlumat əldə etmələrinə şərait yaradıb. İştirakçılar spikerlərlə canlı ünsiyyət quraraq öz suallarını veriblər və ətraflı cavablar alıblar.
Tədbirə yüzdən çox tələbə qatılıb. Forumun sonunda iştirakçılar öz fikirlərini bölüşərək tədbirin onlar üçün çox faydalı olduğunu vurğulayıblar. Təşkilatçılar belə layihələrin davamlı olacağını və gənclərin inkişafına dəstək göstərmək üçün daha çox imkanlar yaradacaqlarını bildiriblər.
Xatırladaq ki, 2019-cu ildən bəri mütəmadi olaraq keçirilən turnir bütün ölkə gənclərini əhatə edərək onların intellektual səviyyələrinin, dünyagörüşlərinin stimullaşdırılmasına, həmçinin şəbəkələşməsinə təkan verir. Bu xüsusda Gənclər Fondu intellektinə güvənən hər bir gənci növbəti illərdə bu çağırışa qoşulmağa və bu ənənənin davamçısı olmağa dəvət edir.
Məlumat üçün bildirək ki, Türkdilli dövlətlərin ilk ortaq media platforması olan “Türk Dünyası” (Turkic.World) və “Gənclərin Maarifləndirilməsinə Dəstək” İctimai Birliyi tərəfdaşlıq memorandumu imzalayıb.
