BAKI,TurkicWorld
Azərbaycanın xarici işlər naziri Ceyhun Bayramov ilə ABŞ dövlət katibi Marko Rubio arasında telefon danışığı aparılıb. Tərəflər Azərbaycan–ABŞ strateji tərəfdaşlığının hazırkı vəziyyəti və inkişaf perspektivləri ilə yanaşı, Azərbaycan–Ermənistan normallaşma prosesini müzakirə ediblər.
TurkicWorld xəbər verir ki, Azərbaycan Xarici İşlər Nazirliyinin məlumatına əsasən, telefon danışığı oktyabrın 5-də baş tutub. Söhbət zamanı iki ölkə arasında strateji tərəfdaşlığın inkişafı, regional sülh gündəliyi və qarşılıqlı maraq doğuran digər məsələlər ətrafında fikir mübadiləsi aparılıb.
Tərəflər 2025-ci il avqustun 8-də Vaşinqtonda keçirilmiş zirvə görüşündən sonra Azərbaycan və ABŞ arasında strateji tərəfdaşlığın inkişafı istiqamətində əldə olunan irəliləyişləri qeyd ediblər.
Azərbaycan və ABŞ arasında Strateji Tərəfdaşlıq Xartiyasında müəyyənləşdirilmiş prioritet istiqamətlər üzrə işçi qruplarının fəaliyyətinin ikitərəfli əməkdaşlığın daha da dərinləşdirilməsi baxımından əhəmiyyəti vurğulanıb.
Telefon danışığında Azərbaycan–ABŞ strateji tərəfdaşlığı çərçivəsində 2026-cı ildə əldə edilmiş nəticələr də nəzərdən keçirilib. Bakı Enerji Həftəsi və II Azərbaycan Beynəlxalq İnvestisiya Forumu çərçivəsində enerji, karbohidrogen ehtiyatlarının kəşfiyyatı, işlənməsi və hasilatı, investisiya, rəqəmsal texnologiyalar, ticarət və digər sahələr üzrə imzalanmış sənədlərə diqqət çəkilib.
Qeyd olunub ki, həmin sənədlər Azərbaycanla ABŞ arasında əməkdaşlığın praktiki məzmununun əhəmiyyətli dərəcədə genişləndirilməsinə xidmət edir.
Ceyhun Bayramov Azərbaycanın sülh gündəliyinin irəlilədilməsi, qarşılıqlı etimadın qurulması və regional sabitliyin möhkəmləndirilməsi istiqamətində atdığı addımlar barədə ABŞ dövlət katibinə məlumat verib.
Telefon danışığının sonunda qarşılıqlı maraq doğuran digər məsələlər ətrafında da fikir mübadiləsi aparılıb.
