Bakı. TurkicWorld:
Azərbaycan xalqı sərbəst şəkildə gələcək Prezidentini seçir.
Bunu TurkicWorld-a Ekologiya və Təbii Sərvətlər Nazirliyinin binasında təşkil edilmiş 16 saylı Yasamal ikinci seçki dairəsinin 34 saylı seçki məntəqədə Türkiyədən olan müşahidəçi, TBMM üzvü Şamil Ayrım deyib.
“İlk gəldiyimiz sandıqlardır. Daha öncəki seçkilərdə də müşahidəçi qismində iştirak etmişəm. Hər şey qaydasında irəliləyir. Azərbaycan xalqı sərbəst şəkildə gələcək Prezidentini seçir”, - deyə o bildirib.
Onun sözlərinə görə, bu seçimlərin ayrı bir özəlliyi var.
“Azərbaycan ərazi bütövlüyünü bərpa etdikdən sonra ilk dəfə seçkilər keçirir. Ona görə də Azərbaycan xalqı bu seçkiləri çox vacib hesab edir”, - deyə Şamil Ayrım qeyd edib.
Qeyd edək ki, bu gün Azərbaycanda Prezident seçkiləri keçirilir. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb. Yanvarın 9-da prezidentliyə namizədliyin qeydə alınması başa çatıb.
Seçici siyahılarında 6 milyon 478 min 623 seçicinin adı var. Onlar ölkə üzrə 6537 məntəqədə səs verəcəklər.
Seçkiləri izləmək üçün indiyə qədər 90 372 müşahidəçi qeydə alınıb. Onların 790 nəfəri 72 beynəlxalq təşkilatı təmsil edən müşahidəçilərdir. Bu müşahidəçilər 89 ölkədəndir.
Seçkilər bütün Azərbaycan ərazisini, o cümlədən, işğaldan azad edilmiş əraziləri əhatə edir. İşğaldan azad edilən ərazilərdə 26 seçki məntəqəsi yaradılıb.
Xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi yaradılıb. Həmin məntəqələrdə 23 mindən artıq seçici səsvermə hüququndan istifadə edəcək.
Seçkilərdə 190 beynəlxalq media qurumu iştirak edir. Onların 216 təmsilçisi beynəlxalq müşahidəçi kimi qeydə alınıb.
Səsvermə günü adı seçici siyahısında olan, amma məntəqələrə gəlmək imkanı olmayan seçicilərə Seçki Məcəlləsinin tələbinə görə daşınan qutu çatdırılacaq.
