BAKI,TurkicWorld
ABŞ Prezidenti Donald Tramp "Fox News" telekanalına verdiyi geniş müsahibədə İranla münasibətlərin hazırkı vəziyyətini kəskin tənqid edib. Prezident atəşkəsin çox zəif olduğunu və Tehranın nüvə silahına sahib olmasına heç bir halda icazə verilməyəcəyini bəyan edib.
TurkicWorld xəbər verir ki, Donald Tramp İran tərəfindən təqdim olunan son təklifləri "axmaq" və "zibil parçası" adlandıraraq, Vaşinqtonun bu cür şərtləri qəbul etməyəcəyini vurğulayıb. O bildirib ki, iranlılar əvvəlcə müəyyən məsələlərdə razılaşır, lakin qısa müddət sonra öz vədlərindən geri çəkilirlər.
Müsahibənin ən sensasiyalı məqamı Trampın "nüvə tozu" ilə bağlı açıqlaması olub. Prezidentin sözlərinə görə, İran rəhbərliyi məhv edilmiş nüvə obyektlərindəki qalıqların (nüvə tozunun) təmizlənməsi üçün ABŞ-dan kömək istəyib.
"İranlılar bizə açıq şəkildə bildirdilər ki, məhv edilmiş obyektlərdəki nüvə tozunu onlara təslim etmək niyyətindəyik. Onlarda bu tullantıları idarə etmək üçün lazımi texnologiya yoxdur və bizdən bu sahədə yardım xahiş ediblər."-deyə o qeyd edib.
Tramp İranın mühasirəyə alınması üçün hazırlanan hərbi planı "dahiyanə" adlandırıb və bunu Venesuelada tətbiq olunan strategiya ilə müqayisə edib. O, həmçinin "Project Freedom" (Azadlıq layihəsi) barədə hələ yekun qərar vermədiyini, lakin layihənin miqyasını genişləndirərək onu sadəcə Hörmüz boğazında gəmilərin müşayiəti ilə məhdudlaşdırmayacağını qeyd edib.
Prezident kürd qruplaşmaları ilə bağlı narazılığını da gizlətməyib. O bildirib ki, ABŞ tərəfindən kürdlərə İran daxilində istifadə üçün verilən silahlar təyinatı üzrə çatdırılmayıb. "Biz kürdlərə silah verdik ki, onları İranın içərilərinə keçirsinlər, lakin onlar bu silahları özlərinə götürdülər. Bu, mənim üçün böyük xəbər və məyusluq oldu."-deyə Tranp qeyd edib.
Sonda Tramp İranın sərt xətt tərəfdarı olan liderlərinin gec-tez geri çəkiləcəyini və yeni bir saziş əldə olunana qədər onlara qarşı təzyiqlərin davam edəcəyini vurğulayıb.
