BAKI,TurkicWorld
Pakistanın Baş nazirinin müavini və xarici işlər naziri Məhəmməd İshaq Dar ölkəsinin beynəlxalq sülh və təhlükəsizliyə, eləcə də səmərəli və əhatəli çoxtərəfli əməkdaşlıq sisteminə sadiqliyini bir daha təsdiqləyib.
TurkicWorld xəbər verir ki, Dar Beynəlxalq Sülh Günü münasibətilə yayımladığı bəyanatda həll olunmamış münaqişələrin regional və beynəlxalq təhlükəsizliyə təhdid yaratmaqda davam etdiyini bildirib.
Pakistan xarici işlər naziri qeyd edib ki, xalqların öz müqəddəratını təyinetmə hüququnun məhdudlaşdırıldığı və BMT Təhlükəsizlik Şurasının qətnamələrinin icra olunmadığı şəraitdə davamlı sülhün təmin edilməsi mümkün deyil.
Dar bu vəziyyətin xüsusilə xarici işğal altında olan ərazilərlə bağlı məsələlərdə açıq şəkildə müşahidə edildiyini bildirib.
O, beynəlxalq ictimaiyyətin münaqişələrin sülh yolu ilə həlli, beynəlxalq hüququn prinsiplərinin qorunması və BMT qətnamələrinin icrasının təmin edilməsi istiqamətində səylərini gücləndirməsinin vacibliyini vurğulayıb.
Pakistan hökuməti beynəlxalq sülh və təhlükəsizliyin möhkəmləndirilməsində çoxtərəfli əməkdaşlığın əhəmiyyətini xüsusi qeyd edib.
