BAKI,TurkicWorld,Yusif Şərifzadə
İranın xarici işlər naziri Abbas Əraqçi Pakistan Silahlı Qüvvələrinin Quru Qoşunları komandanı, feldmarşal Asim Münirlə telefon danışığı aparıb. Tərəflər bölgədəki son hadisələri, davam edən qarşıdurmanın diplomatik yollarla həlli imkanlarını və İran–Pakistan münasibətlərinin inkişafını müzakirə ediblər.
TurkicWorld xəbər verir ki, telefon danışığı zamanı Abbas Əraqçi və Asim Münir bölgədəki mövcud vəziyyətin müxtəlif istiqamətləri ətrafında fikir mübadiləsi aparıblar. Danışıqlarda qarşıdurmanın siyasi və diplomatik vasitələrlə həllinə nail olmaq imkanlarına xüsusi diqqət yetirilib.
Tərəflər İran və Pakistan arasında ikitərəfli münasibətlərin daha da inkişaf etdirilməsi yollarını da nəzərdən keçiriblər. Tehran və İslamabad arasında siyasi məsləhətləşmələrin davam etdirilməsinin vacibliyi vurğulanıb.
Pakistan İranla ABŞ arasında müharibənin dayandırılmasına yönəlmiş danışıqlarda vasitəçi ölkələrdən biri kimi çıxış edib. İslamabadın vasitəçiliyi ilə aparılan danışıqlar iyunun 17-də tərəflər arasında anlaşma sənədinin qəbul edilməsinə gətirib çıxarmışdı.
Sənəddə İranla ABŞ arasında yekun razılaşmanın əldə olunması məqsədilə danışıqlar üçün 60 günlük müddət nəzərdə tutulmuşdu. Lakin tərəflər həmin müddət ərzində yekun razılaşmaya gələ bilməyiblər.
Əraqçi daha əvvəl də Pakistanın vasitəçilik səylərinin əhəmiyyətini vurğulamışdı. Tehran bölgədəki qarşıdurmaların aradan qaldırılması üçün siyasi və diplomatik imkanlardan istifadə olunmasını dəstəklədiyini bildirir.
İran və Pakistan rəsmiləri son dövrdə bölgədəki təhlükəsizlik vəziyyəti ilə əlaqədar təmaslarını intensivləşdiriblər. Əraqçi ilə Asim Münir arasında son telefon danışığı da bu diplomatik təmasların davamı kimi qiymətləndirilir.
