BAKI, TurkicWorld Orxan Qədirzadə
Hindistan hökuməti şənbə günü paytaxt Yeni Dehlidə davam edən genişmiqyaslı tələbə etirazlarının liderləri ilə danışıqların yeni mərhələsinə başlayacaq. Etirazçılar təhsil naziri Dharmendra Pradhanın istefasını və qəbul imtahanı sistemində köklü islahatlar aparılmasını tələb edirlər.
Müşahidəçilərin fikrincə, aksiyalar 2014-cü ildə hakimiyyətə gələn Baş nazir Narendra Modi üçün gənclər tərəfindən təşkil olunan ən ciddi etiraz dalğası hesab olunur. Müxalifət partiyaları da etirazçıların tələblərini dəstəkləyərək parlamentin musson sessiyasında hökumətə qarşı təzyiqi artırıblar.
Etirazlar davam edir
Paytaxtın mərkəzində minlərlə nümayişçi aksiyalara qoşulub. Hakimiyyət etirazların keçirildiyi əraziyə girişi məhdudlaşdırmaq məqsədilə şəhərin 18 metro stansiyasını dördüncü gündür bağlı saxlayır.
Etirazçıların nümayəndəsi Aşutoş Ranka bildirib ki, hökumət şənbə günü günortadan sonra yeni görüş üçün vaxt təyin edib.
"Bizə təhsil naziri Dharmendra Pradhanın taleyi ilə bağlı aydın cavab lazımdır. Hökumət onun istefasını tələb edəcək, yoxsa yox? Biz yalnız 'bəli' və ya 'xeyr' cavabı istəyirik", – deyə o bildirib.
Polis müdaxiləsi narazılığı artırıb
Etirazların daha da genişlənməsinə bu həftənin əvvəlində polis müdaxiləsi səbəb olub. Parlamentə yürüş etmək istəyən on minlərlə tələbəyə qarşı gözyaşardıcı qazdan və dəyənəklərdən istifadə edilməsi nəticəsində çoxsaylı yaralananlar olub.
Aksiya iştirakçıları bildirirlər ki, onların narazılığı yalnız qəbul imtahanlarında sualların əvvəlcədən yayılması ilə bağlı deyil. Gənclər iş yerlərinin azlığı, korrupsiya və hökumətin hesabatlılığı ilə bağlı problemlərə də etiraz edirlər.
Hökumətlə danışıqlar davam edir
Cümə günü keçirilən görüşdə etiraz hərəkatının nümayəndələri Saurav Das və Aşutoş Ranka federal nazirlər C.P. Nadda və Citendra Sinqhə xəbərdarlıq ediblər ki, təhsil naziri istefa vermədiyi halda etirazlar daha geniş miqyas ala bilər.
Danışıqlar tanınmış ictimai fəal Sonam Vanqçukun 26 günlük aclıq aksiyasını dayandırmasından bir neçə saat sonra baş tutub. Bu addım kompromis əldə olunacağına dair ümidləri artırıb.
İnternet məhdudiyyətləri uzadılıb
Məlumata görə, hökumət etirazların keçirildiyi ərazidə mobil internetin dayandırılması qərarını beşinci gün də uzadıb.
Etirazçılar bu məhdudiyyətləri tənqid etsələr də, aksiyaların davam edəcəyini bildirirlər.
"İnterneti, metronu və avtobusları bağlaya bilərlər. Amma bu, heç nəyi dəyişməyəcək. Etiraz etmək istəyən insanlar yenə də gələcəklər", – deyə aksiya iştirakçıları bildirib.
Etirazların əsas səbəbi tibb universitetlərinə qəbul imtahanlarının suallarının əvvəlcədən sızdırılması olub. Bu qalmaqal nəticəsində 2 milyondan çox abituriyent imtahanı yenidən verməyə məcbur qalıb və bu hadisə Hindistanın təhsil sistemində ciddi problemləri üzə çıxarıb.
