BAKI,TurkicWorld,Yusif Şərifzadə
ABŞ vitse-prezidenti Cey Di Vens bildirib ki, Beynəlxalq Atom Enerjisi Agentliyinin (BAEA) nüvə müfəttişləri İranın ilkin razılaşmaya əməl edib-etmədiyini yoxlamaq üçün yenidən ölkəyə qayıdacaq.
TurkicWorld xəbər verir ki, Vens bu barədə İsveçrənin Bürqenştok şəhərində jurnalistlərə açıqlama verib.
O qeyd edib ki, ABŞ tərəfinin məqsədi yekun razılaşmanın əldə olunması və uzunmüddətli həllin təmin edilməsidir.
Vens bildirib ki, danışıqlarda artıq ciddi irəliləyiş əldə olunub və bu, müfəttişlərin fəaliyyətinin bərpası baxımından müsbət addımdır.
ABŞ vitse-prezidentinin sözlərinə görə, o, gecə saat 02:00 radələrində BMT-nin nüvə müfəttişləri ilə əlaqə saxlamağa çalışsa da, telefon zənginə cavab verən olmayıb.
O əlavə edib ki, müfəttişlərin İranla bağlı proseslərə cəlb olunması bu həftə başlaya bilər, bəzi təmasların isə hətta dərhal həyata keçirilməsi mümkündür.
Vens vurğulayıb ki, ABŞ İranın nüvə proqramı ilə bağlı şəffaflığın artırılmasını əsas prioritet kimi görür.
