BAKI,TurkicWorld,Yusif Şərifzadə
İran Hörmüz boğazında gəmi hərəkətinin idarə olunması və təhlükəsizlik qaydaları ilə bağlı mövqeyini yenidən açıqlayıb.
TurkicWorld xəbər verir ki, İranın Xatəm əl-Ənbiya Mərkəzi Qərargahı Hörmüz boğazındakı vəziyyətlə bağlı bəyanat yayıb.
Bəyanatda qeyd olunub ki, boğazda keçid qaydalarının tətbiqi və gəmi hərəkətinin koordinasiyası İran Silahlı Qüvvələrinin səlahiyyətləri çərçivəsində həyata keçirilir.
Qurumun açıqlamasına görə, bölgədən keçən bütün ticarət və hərbi gəmilər müəyyən edilmiş marşrutlara riayət etməlidir.
İran mediasında yayılan məlumatlarda həmçinin qeyd olunur ki, boğazdan keçən gəmilər üçün təhlükəsizlik prosedurlarının yerinə yetirilməsi vacib hesab edilir.
Bəyanatda qaydaların pozulmasının dəniz nəqliyyatının təhlükəsizliyinə ciddi təhdid yarada biləcəyi vurğulanıb.
İran İslam İnqilabı Keşikçiləri Korpusu da ayrıca açıqlamasında xarici hərbi qüvvələrin boğazdakı fəaliyyətinə və ya gəmiçilik proseslərinə müdaxiləsinə qarşı tədbirlər görüləcəyini bildirib.
Son günlər Hörmüz boğazında təhlükəsizlik məsələləri ilə bağlı bir sıra açıqlamalar verilib. Boğaz dünyanın ən mühüm enerji və ticarət marşrutlarından biri hesab olunduğundan burada baş verən hər hansı hadisə beynəlxalq bazarlar və qlobal gəmiçilik sektoru tərəfindən diqqətlə izlənilir.
Ekspertlər qeyd edirlər ki, Hörmüz boğazı vasitəsilə daşınan enerji resurslarının həcmi nəzərə alınarsa, bölgədə təhlükəsizliklə bağlı hər hansı gərginliyin qlobal iqtisadiyyata və enerji bazarlarına təsiri böyük ola bilər.
