Bakı, TurkicWorld
Cənubi Koreyada prezident Yoon Suk Yeol dekabrın 3-də hərbi vəziyyət elan etməyi təklif edən müdafiə naziri Kim Yong-hyunun istefasını qəbul edib.
TurkicWorld xəbər verir ki, bu barədə yerli mətbuat məlumat yayıb . Prezident Aparatı istefanın qəbul edildiyini təsdiqlədikdən sonra, hərbi vəziyyət əvvəlcə parlamentin 190 səslə qəbul etdiyi qərarla, ardından isə nazirlər şurasının təsdiqi ilə bir neçə saat ərzində ləğv edilib.
Müdafiə naziri Kim istefasından əvvəl yazılı açıqlama yayımlayaraq, narahatlıq və xaosa səbəb olduğu üçün vətəndaşlardan üzr istəyib. O, hərbi vəziyyətlə bağlı bütün göstərişlərin birbaşa ondan gəldiyini və məsuliyyəti tamamilə öz üzərinə götürdüyünü bildirib.
Bu arada, müxalifət partiyaları hərbi vəziyyətin qanunsuz olduğunu iddia edərək prezident Yoonun impiçmenti üçün parlamentə vəsatət təqdim ediblər. Müdafiə Nazirliyi isə Kim Yong-hyunun hərbi vəziyyətin elan edilməsini şəxsən prezidentə təklif etdiyini təsdiqləyib.
Yoon, istefa edən Kim Yong-hyunun yerinə Səudiyyə Ərəbistanındakı səfir Çoi Byong-hukun müdafiə naziri vəzifəsinə namizədliyini irəli sürüb. İstefada olan general Çoi daha əvvəl Cənubi Koreya-ABŞ Birləşmiş Qüvvələrinin komandanı vəzifəsində çalışıb.
Hərbi vəziyyətin elan edilməsi zamanı Müdafiə Nazirliyi ordudakı komandirlərə ayıq-sayıq olmaları göstərişi vermiş və hərbi qüvvələr Milli Məclisə yerləşdirilmişdi. Lakin parlamentdə keçirilən fövqəladə iclasda hərbi vəziyyət qərarı ləğv edilib.
Prezident Yoon, parlament qərarından sonra geri addım ataraq nazirlər şurasını toplayıb və hərbi vəziyyətin rəsmi olaraq ləğv edildiyini açıqlayıb.
