Bakı, TurkicWorld
Bu gün Əbu Dabidə Ərzaq Təhlükəsizliyinə dair Qlobal Sammit işinə başlayır. Tədbir noyabrın 28-nə qədər davam edəcək Qlobal Qida Həftəsi çərçivəsində baş tutacaq.
TurkicWorld BƏƏ-nin WAM xəbər agentliyinə istinadla bildirir ki, sammitdə dünya ölkələrdən 21 nazir və ərzaq təhlükəsizliyinə cavabdeh dövlət qurumlarının nümayəndələrinin iştirakı gözlənilir.
Sammitdə ərzaq təhlükəsizliyi üzrə dayanıqlı həll yolları müzakirə ediləcək, eləcə də qlobal əməkdaşlıq məsələlərinə, ölkələr və təşkilatlar arasında birgə səylərin artırılması, ərzaq təhlükəsizliyi sistemlərinin gücləndirilməsi və aclığa qarşı mübarizə mövzularına diqqət yetiriləcək.
Sammitdə 80-dən çox ekspert çıxış edərək iqlimə uyğun ağıllı kənd təsərrüfatı, aqrotexnika və tədarük zəncirləri də daxil olmaqla, ərzaq təhlükəsizliyi sahəsində ən son yeniliklərdən danışacaq.
Sammitin əsas hədəfi gələcəkdə çağırışlara cavab verə biləcək dayanıqlı qida sistemləri qurmaq üçün praktik strategiyalar hazırlamaq, ortaq problemləri həll etmək və hər kəs üçün ərzaq təhlükəsizliyini artırmaq məqsədilə qlobal tərəfdaşlıqlar yaratmaqdır.
Bundan əlavə, Ərzaq Həftəsi çərçivəsində Əbu Dabi Beynəlxalq Qida Sərgisi keçiriləcək. Sərgidə 70-dən çox ölkədən ərzaq və içki sektorunda fəaliyyət göstərən 700-dək şirkətin iştirakı gözlənilir. Bu sərgidə qida texnologiyaları və dayanıqlı ərzaq sənayesindəki ən son yenilikləri təqdim edən aparıcı qlobal markalar bir araya gələcək.
Sərgi qida sənayesində ticarət əlaqələri qurmaq və bilik mübadiləsi üçün hərtərəfli bir platformadır. Burada Gələcəyin Qida Muzeyi də təqdim ediləcək. Bu təşəbbüsü israf olunmayan qida təcrübələrini və innovasiyalarını araşdıran İspaniyanın Plat İnstitutu irəli sürüb.
Qlobal Qida Həftəsi çərçivəsində təşkil ediləcək Əbu Dabi Qəhvə Platformasında isə qəhvə mədəniyyəti ilə bağlı seminarlar, müzakirələr və canlı müsabiqələr keçiriləcək.
"Michelin ulduzu"na layiq görülmüş aşpazlar Qlobal Qida Həftəsi çərçivəsindəki "Gourmet" sərgisində öz kulinariya bacarıqlarını nümayiş etdirəcək, qlobal dadları dayanıqlı və innovativ təcrübələrlə birləşdirəcəklər.
Eyni zamanda, Həftə çərçivəsində baş tutacaq 10-cu Əbu Dabi Xurma Sərgisi təchizatçılar, istehsalçılar, mütəxəssislər və bu sahəyə marağı olan ziyarətçilər üçün ideal bir əlaqə platformasına çevriləcək. Sərgidə xurma istehsal edən 20-dən çox ölkə iştirak edəcək.
Həmçinin, qida və içki tədarükçülərini böyük alıcılarla əlaqələndirmək üçün nəzərdə tutulan Qonaq Alıcı Proqramı, aviasiya, mehmanxana və digər sektorlarda ərzaq təminatı sahələrində ticarət əlaqələri qurmaq üçün bənzərsiz imkanlar təqdim edəcək.
Sərgilərin ziyarətçiləri Birləşmiş Ərəb Əmirlikləri Universiteti və digər beynəlxalq akademik institutların əməkdaşlarının moderatorluğu ilə təşkil ediləcək sessiya və müzakirələrdə iştirak etmək, bununla da ərzaq təhlükəsizliyi ilə bağlı innovasiyalar sahəsində gələcəyin liderlərinin fikirləri ilə tanış olmaq imkanı əldə edəcəklər.
Qlobal Qida Həftəsi BƏƏ-nin vitse-prezidenti, Nazirlər Kabineti başçısının müavini, Əbu Dabi Kənd Təsərrüfatı və Ərzaq Təhlükəsizliyi təşkilatının idarə heyətinin sədri Şeyx Mansur bin Zayed Al Nəhyanın himayəsi ilə keçirilir.
