BAKI, TurkicWorld
Suriya vətəndaş müharibəsi fonunda adı ön plana çıxan hərbi fiqurlardan biri Seyf Əbubəkir Poladdır.
Uzun illər silahlı müxalif qüvvələr daxilində fəaliyyət göstərən Polat hərbi təcrübəsi, komandanlıq bacarığı və sahədəki təsiri ilə seçilən simalardandır.
Seyf Əbubəkir Polad 2013-cü ildə Suriyanın Həsəkə vilayətinin cənub kəndlərində yaradılan əsasən türkmənlərdən ibarət olan Həmzə Briqadasının qurucularından biri olub. İlk mərhələdə briqada səviyyəsində fəaliyyət göstərən bu struktur, sonrakı illərdə genişlənərək daha böyük hərbi birliyə çevrilib. Polad həmin dövrdə həm təşkilati, həm də əməliyyat baxımından əsas fiqurlardan biri kimi tanınıb.
Həmzə Diviziyasının formalaşması və Poladın rolu
2016-cı ildə müxtəlif silahlı qrupların birləşməsi nəticəsində Həmzə Diviziyası rəsmi şəkildə yaradılıb. Bu strukturun formalaşmasından sonra Seyf Əbubəkir Polad diviziyanın komandanı təyin edilib. Onun rəhbərliyi dövründə diviziya əvvəlcə İŞİD-ə, daha sonra isə Suriya rejim qüvvələrinə qarşı aparılan döyüşlərdə fəal iştirak edib.
Həmzə Diviziyası tərkibində təxminən altı minə yaxın döyüşçünün cəmləşdiyi, Suriya Milli Ordusunun ən döyüş qabiliyyətli birləşmələrindən biri kimi qiymətləndirilir. Fərat Qalxanı, Zeytun Budağı və Barış Pınarı əməliyyatlarında diviziyanın iştirakı onun bölgədəki çəkisini daha da artırıb.
Suriya Milli Ordusunda yüksəliş
Sonrakı mərhələdə Seyf Əbubəkir Polad Suriya Milli Ordusunun 2-ci Korpusunun Xüsusi Təyinatlı Qüvvələrinin baş komandanı vəzifəsinə gətirilib. Bu postda o, PKK/SDQ və digər silahlı qruplara qarşı aparılan əməliyyatların planlaşdırılmasında və icrasında iştirak edib.
Suriya Müdafiə Nazirliyinin qərarı ilə Polada General-mayor rütbəsi verilib və o, Hələb bölgəsində yerləşən 76-cı Diviziyanın komandanı təyin olunub. Bu təyinat Hələb və ətraf ərazilərdə təhlükəsizlik balansı baxımından mühüm addım kimi qiymətləndirilir.
Diplomatik fəaliyyət və regional təmaslar
Polad yalnız hərbi sahədə deyil, siyasi və diplomatik müstəvidə də aktivliyi ilə diqqət çəkir. 2024–2025-ci illərdə Türkiyədə bir sıra siyasi və ictimai xadimlərlə görüşlər keçirib, türkmən icmasının mövcud vəziyyəti və regional əməkdaşlıq imkanları ilə bağlı müzakirələr aparıb. Bu görüşlərdə Suriya türkmanlarının mövqeyini çatdıran Polad, tarixi və mədəni bağların qorunmasının vacibliyini vurğulayıb.
Süleyman Şah Türbəsinin qorunması əməliyyatı
21 yanvar 2026-cı il tarixində Seyf Əbubəkir Polad Karakozak bölgəsində aparılan əməliyyatların tamamlandığını və Süleyman Şah Türbəsinin ətrafının silahlı qruplardan tam təmizləndiyini açıqlayıb. Onun paylaşdığı görüntülərdə bu əməliyyatın Türkiyə və türk dünyası üçün xüsusi əhəmiyyət daşıdığı bildirilib. Polad türbənin qorunmasını “namus və vətən borcu” kimi dəyərləndirib.
Hazırda Hələb və ətraf bölgələrdə təhlükəsizlik arxitekturasının formalaşdırılmasında əsas fiqurlardan biri kimi göstərilən Seyf Əbubəkir Polad, Suriya müharibəsinin son mərhələsində ön plana çıxan türkman komandanlar sırasında xüsusi yer tutur. Onun fəaliyyəti həm hərbi, həm də siyasi baxımdan bölgədə yeni balansların formalaşmasına təsir edən amillərdən biri kimi dəyərləndirilir.
