BAKI,TurkicWorld
Türkiyə Prezidenti Rəcəb Tayyib Ərdoğan kapital bazarlarında baş verən son hadisələr və investisiya fondları ilə bağlı aparılan araşdırma barədə açıqlama verib. Ərdoğanın sədrliyi ilə Beştəpədə iqtisadiyyat rəsmilərinin iştirakı ilə keçirilən toplantıda fond bazarındakı vəziyyət və görüləcək tədbirlər müzakirə olunub. Sentyabrın 29-da keçirilən toplantının təxminən 2,5 saat davam etdiyi bildirilir.
TurkicWorld xəbər verir ki, Ərdoğan daha sonra hakim Ədalət və İnkişaf Partiyasının (AK Parti) 182-ci Genişləndirilmiş Vilayət Sədrləri Toplantısında fondlarla bağlı araşdırmaya toxunaraq prosesin ilk gündən hökumətin diqqətində olduğunu bildirib. O, aidiyyəti dövlət qurumlarının məsələ üzərində işlədiyini və fəaliyyət istiqamətlərinin müəyyənləşdirildiyini deyib.
Ərdoğanın sözlərinə görə, ləğvinə qərar verilmiş fondlarla bağlı vitse-prezidentin rəhbərliyi altında səlahiyyətli struktur yaradılıb və dövlətin nəzarət qurumuna da müvafiq tapşırıqlar verilib. Prezident Türkiyənin bu prosesdən iqtisadiyyatı və kapital bazarları daha güclü şəkildə çıxaraq keçəcəyinə inandığını söyləyib.
Fondlarla bağlı araşdırma İstanbul Respublika Baş Prokurorluğu tərəfindən aparılır. Türkiyənin ədliyyə naziri Akın Gürlək sentyabrın 26-da bildirmişdi ki, iyulun 1-dən sentyabrın 16-dək fond əməliyyatlarının araşdırılması çərçivəsində 46 hüquqi şəxsin, 18 fondun və 42 fiziki şəxsin aktivləri dondurulmuşdu.
Ərdoğan bir gün əvvəl də fond bazarında yaranmış problemin maliyyə sisteminin bütününə yayılmış risk təşkil etmədiyini bildirmiş və Türkiyə kapital bazarlarının dayanıqlı olduğunu vurğulamışdı. Habertürk
