BAKI, TurkicWorld, Orxan Qədirzadə
Türkiyədə Çin şirkətinin planlaşdırdığı avtomobil zavodu layihəsində gecikmə hökumətin diqqətini çəkib.
TurkicWorld xəbər verir ki, Türkiyədə Manisa vilayətində elektrik avtomobilləri istehsalı üçün nəzərdə tutulan zavod layihəsində gecikmə parlamentdə müzakirə mövzusu olub.
Türkiyənin sənaye və texnologiya naziri Fatih Kacır bildirib ki, layihə dövlətin investisiya təşviqi mexanizmləri çərçivəsində diqqətlə izlənilir. Onun sözlərinə görə, investor şirkət müəyyən edilmiş şərtləri yerinə yetirmədiyi halda qanunvericiliyə uyğun tədbirlər görülə bilər.
Nazir qeyd edib ki, avtomobil sənayesi Türkiyə iqtisadiyyatının aparıcı sahələrindən biridir. Geniş sənaye infrastrukturu, böyük ixrac həcmi və yüksək məşğulluq potensialı ilə bu sektor ölkə üçün strateji əhəmiyyət daşıyır.
Fatih Kacır vurğulayıb ki, Türkiyənin məqsədi həm daxiliyanma mühərrikli avtomobillər, həm də elektrik avtomobilləri sahəsində dünyanın əsas istehsal mərkəzlərindən birinə çevrilməkdir.
Nazirin sözlərinə görə, Çin şirkətinin Türkiyədə investisiya qərarı hökumətin uzunmüddətli sənaye strategiyasının nəticəsi hesab olunur. O bildirib ki, layihə dövlət dəstəyi ilə həyata keçirilsə də, bütün investisiyalar müəyyən edilmiş şərtlər və vaxt qrafiki çərçivəsində icra olunmalıdır.
Məlumata görə, 2024-cü ildə Çin avtomobil istehsalçısı BYD ilə Türkiyə Sənaye və Texnologiya Nazirliyi arasında Manisada avtomobil zavodunun tikintisinə dair təxminən 1 milyard dollarlıq investisiya sazişi imzalanıb.
Planlara əsasən, illik 150 min avtomobil istehsal gücünə malik olacaq müəssisənin 2026-cı ilin sonuna qədər fəaliyyətə başlaması və təxminən 5 min nəfər üçün iş yeri yaratması nəzərdə tutulur.
Bununla yanaşı, layihə üzrə nəzərdə tutulan müddət ərzində tikinti işlərinə başlanılmaması rəsmi qurumların diqqətini cəlb edib. Rəsmilər bildirirlər ki, investisiya öhdəlikləri yerinə yetirilmədiyi halda qanunvericilikdə nəzərdə tutulan sanksiyalar tətbiq edilə bilər.
