BAKI,TurkicWorld, Orxan Qədirzadə
Türkiyə Milliyətçi Hərəkat Partiyası sədri Devlet Bahçeli Qüds mövzusu ilə bağlı Prezident Rəcəb Tayyib Ərdoğana çağırış edib.
TurkicWorld xəbər verir ki, MHP lideri tv100 kanalına verdiyi müsahibədə Prezident Ərdoğanla aralarında keçən dialoqu bölüşüb. O xatırladıb ki, tarixdə Qüds adı ilə bağlı dörd böyük simvolik şəxsiyyət var: Hz. Ömər, Salahəddin Əyyubi, Yavuz Sultan Səlim və II Əbdülhəmid. Baxçalının sözlərinə görə, o, Prezident Ərdoğana “Bu dörd ad Qüds üçün simvoldur. Niyə beşinci siz olmayasınız?” deyə müraciət edib.
Bahçeli bildirib ki, Türkiyənin regional və qlobal proseslərdə tutduğu mövqe Prezident Ərdoğanın Qüds məsələsində də tarixi rol oynamasına əsas yaradır.
Bahçeli qeyd edib ki, tarixən Dəməşq və Qüds arasında strateji və siyasi bağlılıq mövcud olub və bölgədə insanlar güvənəcəkləri lider axtarır. Onun fikrincə, Türkiyə bu gün həm Rusiya–Ukrayna dialoqunda, həm də Qəzza məsələsində ən fəal ölkələrdən biridir və bu proseslərdə Prezident Ərdoğanın rolu xüsusi əhəmiyyət daşıyır.
MHP sədri vurğulayıb ki, əgər Qəzza və Qüds məsələləri ilə bağlı beynəlxalq təşəbbüslərdə rəhbərlik mövqeyi formalaşacaqsa, bu postun Prezident Ərdoğana məxsus olması məntiqlidir. O, keçən həftə partiyasının qrup toplantısında da bu mövqeni ifadə etdiyini xatırladıb və mətbuatda bunun geniş əks-səda doğurduğunu bildirib.
Bahçeli Prezident Ərdoğana dəstəyinin davam etdiyini xüsusi vurğulayıb.
