Bakı, TurkicWorld
Türkiyə Prezidenti Rəcəb Tayyib Ərdoğan, Qırğızıstan Prezidenti Sadır Caparov ilə Türkiyə-Qırğızıstan Yüksək Səviyyəli Strateji Əməkdaşlıq Şurasının 6-cı toplantısında görüşüb.
TurkicWorld xəbər verir ki, Ərdoğan, Qırğızıstanla terrorla mübarizə sahəsində əməkdaşlığın davam edəcəyini vurğulayaraq, FETÖ də daxil olmaqla, hər cür terrorizmə qarşı mübarizənin fasiləsiz olacağına inandığını bildirib.
Görüş zamanı Qırğızıstanda olmaqdan məmnun olduğunu ifadə edən Ərdoğan, Qırğızıstana "qeyri-adi" ev sahibliyi üçün təşəkkür edib.
O, Qara-Qırğız Bölgəsinin yaradılmasının 100-cü ildönümünü qeyd edərək, iki ölkə arasında strateji tərəfdaşlığın daha da güclənəcəyini vurğulayıb.
Ərdoğan, təhlükəsizlik, nəqliyyat, səhiyyə və digər sahələrdə əlaqələri dərinləşdirəcək yeni bir mexanizm qurulacağını, həmçinin iki ölkə arasında ikitərəfli ticarət həcminin 5 milyard dollara çatdırılması məqsədində razılığa gəldiklərini bildirib.
Ərdoğan, Türkiyənin bu ölkədəki sərmayələrinin əhəmiyyətinə diqqət çəkərək, Qırğız Respublikasında ən böyük sərmayə qoyan ölkələrdən biri olduğunu vurğulayıb.
Türkiyə İqtisadi İnkişaf Agentliyi (TİKA) tərəfindən 1992-ci ildən bəri Qırğızıstanda 1000-dən çox layihənin həyata keçirildiyini qeyd edərək, bu işlərə görə təşəkkürünü bildirib.
Ərdoğan, iki ölkənin təhlükəsizlik qurumları arasındakı əməkdaşlığın da uğurla davam etdiyini, imzalanacaq təhlükəsizlik əməkdaşlıq müqaviləsi ilə bu əməkdaşlığın daha da gücləndiriləcəyini vurğulayıb.
Təhsil sahəsində əməkdaşlığa da toxunan Ərdoğan, Manas Universitetinin dünyanın ən yaxşı universitetləri arasında yer almasının sevindirici olduğunu bildirib.
Toplantının nəticələrini qiymətləndirən Ərdoğan, iki ölkə arasında 19 müqavilənin imzalanacağını bildirib.
Müqavilələrin imzalanma mərasimi başa çatdıqdan sonra Ərdoğan, Bişkekdə Ürkün abidəsini ziyarət edib. Abidə önünə əklil qoyan Prezident, səlahiyyətlilərdən məlumat alıb.
Daha sonra, qırğız yazıçısı və dövlət xadimi Cengiz Aytmatovun məzarını ziyarət edib və orada Qurani-Kərim tilavətini dinləyib.
