İsveç səfiri Türkiyə Xarici İşlər Nazirliyinə çağırılıb

İsveç səfiri Türkiyə Xarici İşlər Nazirliyinə çağırılıb

Noyabrın 21-də Türkiyə Xarici İşlər Nazirliyi (XİN) İsveçin Ankaradakı səfiri Staffan Herrströmü çağırıb.

Trend-in məlumatına görə, bu barədə Nazirlikdəki diplomatik mənbələrdən bildirilib.

Məlumata əsasən, Türkiyənin Stokholmdakı səfirliyinə qarşı təxribatla bağlı səfirə etiraz ifadə edilib.

Türkiyənin bu əməli pisləməsi və hadisə ilə bağlı araşdırma aparılması tələbi İsveç səfirinin diqqətinə çatdırılıb.

Türkiyə XİN vurğulayıb ki, Ankara bu qəbuledilməz əmələ görə məsuliyyət daşıyanların müəyyən ediləcəyini və onlara qarşı lazımi tədbirlərin görülməsini gözləyir.

Səfirə bildirilib ki, Türkiyə, İsveç və Finlandiya üçtərəfli memorandumunda göstərilən öhdəliklər fonunda Türkiyə tərəfi də İsveçdən konkret addımlar gözləyir.

Qeyd edək ki, bu gün PKK terror təşkilatının tərəfdarları diplomatik nümayəndəliyin binasında PKK-nın təbliğatını və Türkiyə prezidenti Rəcəb Tayyib Ərdoğanın ünvanına təhqiramiz sözləri əks etdirən ifadələr və görüntülər proyeksiya edib.