BAKI, TurkicWorld
Qazaxıstan Parlamenti Məclisi, 2024-cü il aprelin 19-da Astana şəhərində imzalanmış Qazaxıstan və Qırğızıstan arasında müttəfiqlik münasibətlərinin dərinləşdirilməsi və genişləndirilməsi haqqında Müqaviləni ratifikasiya edib.
TurkicWorld xəbər verir ki, sənədin məqsədi iki ölkə arasında əməkdaşlığa yeni dinamika vermək və ikitərəfli əlaqələrin bütün sahələrdə hərtərəfli inkişafını təmin etməkdir.
Müqavilə siyasi, hərbi, iqtisadi, investisiya, kənd təsərrüfatı, nəqliyyat, su-enerji, təhsil, elm, mədəniyyət və humanitar sahələrdə qarşılıqlı faydalı əməkdaşlığın genişləndirilməsini nəzərdə tutur.
Sənədin 2-ci maddəsində tərəflər arasında Yüksək Səviyyəli Dövlətlərarası Şuranın fəaliyyətinin xüsusi əhəmiyyəti vurğulanır. 3-cü maddəyə əsasən isə Qazaxıstan Parlamenti ilə Qırğızıstan Joqorku Keneşi arasında parlamentlərarası əməkdaşlığın gücləndirilməsi dəstəklənir.
Tərəflər, eyni zamanda, terrorizm, ekstremizm, separatizm, kibercinayətkarlıq, insan alveri və narkotiklərin qeyri-qanuni dövriyyəsi kimi təhlükəsizlik təhdidlərinə qarşı birgə mübarizəni də gücləndirmək niyyətindədir.
Məclisin Beynəlxalq əlaqələr, müdafiə və təhlükəsizlik komitəsinin rəyində qeyd olunub ki, tərəflər uzunmüddətli əsasda əməkdaşlığı qarşılıqlı etimad, bərabərlik, milli maraqlara hörmət və ərazi bütövlüyünün qorunması prinsipləri əsasında qururlar.
