BAKI, TurkicWorld, Nailə Babazadə
BMT-nin Uşaq Fondunun (UNICEF) məlumatına görə, Sudanın Qərbi Kordofan bölgəsində məcburi köçkün düşərgəsinə endirilən dron zərbəsi nəticəsində azı 15 uşaq ölüb.
TurkicWorld xəbər verir ki, UNICEF-in 18 fevral tarixli bəyanatında bildirilir: 16 fevralda Əl-Sunut ərazisində yerləşən məcburi köçkün düşərgəsinə dron zərbəsi endirilib, nəticədə azı 15 uşaq həlak olub, 10 uşaq yaralanıb.
UNICEF-in icraçı direktoru Ketrin Rassel Kordofan bölgəsində vəziyyətin kəskinləşdiyini qeyd edərək, Darfurda müşahidə olunan “narahatedici oxşar mənzərələrin” burada da təkrarlandığını vurğulayıb: uşaqların öldürüldüyünü, yaralandığını, didərgin düşdüyünü və yaşamaq üçün zəruri xidmətlərdən təcrid edildiyini bildirib.
Bununla yanaşı, BMT-nin İnsan Hüquqları üzrə Ali Komissarlığı son günlər Sudanın müxtəlif bölgələrində dron hücumları nəticəsində mülki itkilərin artmasından narahatlığını ifadə edib.
