Bakı. TurkicWorld:
İtaliyanın Augusta limanında CIF bazisi üzrə Azərbaycanın "Azeri Light" markalı neftinin qiyməti əvvəlki göstərici ilə müqayisədə 3,69 ABŞ dolları və ya 3,13 faiz artaraq bir barel üçün 121,43 ABŞ dollarına çatıb.
Bu barədə neft bazarı iştirakçılarının məlumatında bildirilib.
Qeyd olunub ki, Türkiyənin Ceyhan limanında FOB bazisi üzrə "Azeri Light" markalı neftin bir barelinin qiyməti 3,71 ABŞ dolları və ya 3,34 faiz artaraq 114,72 ABŞ dolları təşkil edib.
"Urals" markalı xam neftin qiyməti əvvəlki göstərici ilə müqayisədə 4,08 ABŞ dolları və ya 5,18 faiz artaraq bir barel üçün 82,87 ABŞ dollarına çatıb.
Şimal dənizində hasil edilən "Dated Brent" markalı neftin qiyməti isə əvvəlki göstərici ilə müqayisədə 3,43 ABŞ dolları və ya 2,95 faiz azalaraq bir barel üçün 119,86 ABŞ dolları olub.
Azərbaycanın 2026-ci il dövlət büdcəsində bir barel neftin orta qiyməti 65 ABŞ dolları səviyyəsində hesablanıb.
"Trading Economics"in məlumatına görə, cümə axşamı xam neftin qiyməti bir barel üçün 92 dollardan aşağı düşüb. Bildirilib ki, bu, ABŞ-İran danışıqları ətrafında qeyri-müəyyənliyin artması fonunda əvvəlki sessiyada əldə olunan artımın bir hissəsinin itirilməsi ilə nəticələnib.
"İran Prezidenti Məsud Pezeşkian BMT Baş Assambleyasındakı çıxışında Tehranın təhdidlər qarşısında geri çəkilməyəcəyini bildirib. O qeyd edib ki, İran iqtisadi inkişaf üçün nüvə texnologiyasını inkişaf etdirmək hüququndan imtina etməyəcək.
Pezeşkian həmçinin bildirib ki, sanksiyalar və ABŞ-nin blokadası qüvvədə qaldığı müddətdə İran Hörmüz boğazında gəmiçilik azadlığına icazə verməyəcək.
ABŞ-da isə energetika naziri Kris Rayt bildirib ki, Donald Tramp administrasiyası xaricə dizel yanacağı tədarükünə rəsmi qadağa tətbiq etmək əvəzinə, ABŞ-dakı neft emalı şirkətləri ilə dizel ixracının könüllü şəkildə azaldılması üzərində işləyir.
Bu arada Səudiyyə Ərəbistanı mühüm Şərq-Qərb neft kəməri vasitəsilə neft ixracını bərpa etmək üçün addımlar atır.
Ukrayna Prezidenti Volodimir Zelenski də bildirib ki, o, Prezident Donald Trampla enerji obyektlərinə qarşı atəşkəs məsələsini müzakirə edib", - məlumatda qeyd edilib.
